Rəhman və Rəhim Allahın adıyla

1. Açıq-aşkar zəfər vermişik sənə.

2. Vermişik ki, sənin keçmiş və gələcək günahlarını bağışlasın, tamamlasın sənə olan ne'mətini, doğru yola yetirsin səni Allah.

3. Və güclü bir yardım göstərsin sənə Allah.

4. Mö'minlərin imanını artırmaq üçün onların ürəyinə arxayınlıq gətirən Odur. Allahındır göylərdəki və yerdəki ordular. Hər şeyi biləndir, müdrikdir Allah.

5. Mö'min kişilərlə qadınları içindən çaylar axan cənnətlərə salar O, oralarda əbədilik qalarlar. Onların təqsirlərindən keçər O. Budur o böyük qurtuluş Allahın dərgahında.

6. Allahın barəsində pis bir zənnə düşən münafiq kişilərlə qadınların, bütpərəst kişilərlə qadınların cəzalarını Allah Özü versin. O pis gümanları öz başlarına gəlsin. Qəzəblənmiş, lə'nətləmiş, cəhənnəmi hazırlamış onlara Allah. Pisdən pis yerdir ora.

7. Allahındır göylərdəki və yerlərdəki ordular. Güclüdür, müdrikdir Allah.

8. Biz səni göndərmişik şahidlik eləyəsən, müjdə verəsən, xəbərdarlıq eləyəsən.

9. Siz də Allaha və Rəsuluna iman gətirin, Rəsula yardım göstərin. Uca tutun adını, səhər-axşam öyün Allahı.

10. Allaha bey'ət gətirmiş olur sənə bey'ət gətirənlər. Əlləri üstünə qoyduğun əlin Allahın əlidir. Andından dönən kimsə öz şərinə dönmüş olar. Allaha verdiyi əhdinə vəfa eləyən kimsəyə böyük bir əcir verəcək O.

11. Savaşdan qalan bədəvilər «Malımızı-mülkümüzü, ailəmizi qorumaqla məşğul idik. Allahdan məğfirət dilə bizim üçün» deyəcəklər sənə. Yrəyində olmayanı deyir dilləri. De ki, «Sizə bir zərər, ya bir yarar vermək istəsə Allah, Onun qarşısını kim kəsə bilər? İşləklərinizdən xəbərdardır Allah».

12. Siz elə zənn elədiniz öz əhlinin içinə daha qayıtmaz olar Rəsulla mö'minlər. Yrəyinizə yatımlı pis bir zənnə düşmüşdünüz. Bununla da özünüzü məhvə məhkum elədiz Allahın dərgahında.

13. Allaha və Rəsuluna iman gətirməyən kəs bilsin, şiddətli bir alov hazırlamışıq kafirlərə.

14. Allahdır göylərin, yerin yiyəsi. İstədiyi kimsəni bağışlar, istədiyi kimsəyə əzab verər. Günahlardan keçəndir, Rəhimdir Allah.

15. Qənimət dalınca siz gedən zaman savaşdan qalan kəslər «Qoyun biz də sizinlə bərabər gedək» deyəcəklər. İstəyirlər dəyişələr Allahın kəlamını [qənimətin yalnız bey'ət gətirən mö'minlər üçün nəzərdə tutulduğunu bildirən Allahın əmrini]. De ki, «Bizim ardımızca getməyəcəksiz. Sizə belə buyurmuş öncədən Allah». Deyəcəklər: «Xeyr, belə deyil. Bəllidir, siz bizə həsəd aparırsız». Az bir qismindən savayı əslində bunların hamısı anlamaz kimsələrdir.

16. Savaşdan qalan o bədəvilərə de ki, «Güclü, qüvvətli bir qövmlə savaşa çağrılacaqsız. Onlar müsəlmanlığı qəbul eləyincə savaşmalı olacaqsız. Bu əmrə itaət etsəniz əgər, Allah sizə gözəl bir əcir verər. Ancaq öncəki sayaq yenə də savaşdan çəkinsəniz, ağrılı bir əzaba uqradar sizi O».

17. Ya kor, ya çolaq, ya da xəstə bir adam savaşdan qalsa əgər, batmaz heç bir günaha. Allaha və Rəsuluna itaətdə olan kəsi içindən çaylar axan cənnətlərə salar O. Haqdan üz döndərəni ağrılı bir əzaba düçar edər O.

18. Ağac altında sənə bey'ət gətirən mö'minlərdən razı qalmışdır Allah. Yrəklərində olanı bilmiş, onlara arxayınlıq bəxş eləmiş və onlara və'd vermiş ki, yaxın vaxtda bir zəfərə yetişəcəklər,

19. bol-bol qənimətlər qazanacaqlar. Güclüdür, müdrikdir Allah.

20. Bol qənimət qazanacağınızı və'd etmişdi sizə Allah. Və bunu dərhal sizə yetirdi ki, başqalarının üstünüzə uzanan əllərini dərhal geri çəkdi ki, sizi doğru yola yönəldə və dərs ola mö'minlərə sizin bu nümunəniz.

21. Ələ keçirməyə gücünüzün çatmadığı və Allahın sizdən ötrü saxladığı başqa qənimətlər də var. Hər şeyə qadirdir Allah.

22. Kafirlər sizinlə savaşsaydılar, basılaraq qaçardılar. Nə bir dost tapılardı, nə də bir yardım eləyən onlara.

23. Allahın bu qanunu öncəki nəsillərə də aid idi. Dəyişməzdir Allahın qanunu.

24. Zəfəri sizə verəndən sonra Məkkənin içində [hadibiyyədə] onların əlini sizdən, sizin də əlinizi onlardan çəkərək savaşı saxlayan O idi. İşləklərinizi görəndir Allah.

25. Kafirlik eləyən, sizi Məscidi Harama yaxın qoymayan, qurbanlıq heyvanlarınızı qurbangaha buraxmayan onlar idi. Sizin tanımadığınız mö'min kişilərlə qadınlar vardı orada. Bilməməzlik üzündən onları əzə bilərdiniz, günaha bata bilərdiniz. Onlar orada olmasaydılar, savaşın qarşısını almazdı Allah. Allah belə elədi ki, rəhmətinin yazısına salsın istədiyi kimsələri. Mö'minlərlə kafirlər aralanmış olsaydılar bir-birindən ağrılı bir əzaba uğradardıq kafirləri.

26. Yrək yanğısıyla cahiliyyə çağının təəssübünü çəkirdi kafirlər. Və bu zaman Rəsulla mö'minlərin ürəyinə arxayınlıq saldı Allah. Və taqva kəlməsini söyləməyə [«Allahdan başqa tanrı yoxdur və Muhamməd Allahın Elçisidir»] vacib bildi mö'minlərə. Bu sözləri söyləməyə onlar daha layiqdilər. Hər şeyi biləndir Allah.

27. Rəsulun rö'yasının haqq olduğunu təsdiq eləmiş Allah. Allah qoysa əmin-amanlıq içində, başlarınız dibindən qırxılı, yaxud saçlarınız qısadılmış halda və qorxu hissi keçirmədən mütləq girəcəksiniz Məscidi Harama. Sizin bilmədiyinizi bilir Allah. Sizə bundan başqa bir zəfər də verəcək yaxında Allah.

28. Bütün dinlərdən haqq dininin üstün olduğunu bildirə deyə Rəsulunu doğru yolu göstərən Qur'an ilə göndərən Odur. Allahın şahidliyi hər şeyə yetərlidir.

29. Muhamməd Allahın Elçisidir. Kafirlərə qarşı sərtdir, bir-birinə mehribandır onunla bir olanlar. Görürsən necə əyilərək səcdəyə qapılırlar, Allahdan fəzilət, razılıq diləyirlər. Onların kimliyi üzlərində səcdənin qoyduğu izdən bilinər. Belələrinin vəsfi Tövratda da, İncildə də verilmiş. Torpaqdan baş qaldırandan sonra bəslənib böyümüş, qalınlaşmış, öz kökü üstündə möhkəm dayanmış və becərənlərin xoşuna gələn bitkini andırır onlar. Artırdıqca artırar sayını onların və bununla kafirləri acıqlandırar Allah. İman gətirənlərə, əməli salehlərə məğfirət və'd eləmiş, böyük bir əcir və'd eləmiş Allah.