Rəhman və Rəhim Allahın adıyla

1. Həmd olsun göyləri, yeri yaradan, cüt qanadlı, üç qanadlı, dörd qanadlı, daha neçə neçə qanadlı mələkləri elçilər eləyən Allaha. Yaratdığı xilqətinə istədiyini artırar. Hər şeyə qadirdir Allah.

2. Allahın rəhmətindən insanlara pay olaraq verdiyinin qarşısını heç kim tutub ala bilməz. O şeyin ki, qarşısını Allah tutub saxlayar, heç kim göndərə bilməz onu. Güclüdür, müdrikdir O.

3. Ey insanlar! Allahın sizə olan ne'mətini hər an anın. Köydən, yerdən sizə ruzi göndərən Allahdan başqa bir yaradan varmıdır? Ondan başqa tanrı yoxdur. Bəs niyə aldanaraq imandan yayınırsız.

4. Səni danırlarsa, qoy dansınlar. Səndən öncəki elçiləri də danmışdılar. Allaha qalar bütün işlər.

5. Ey insanlar! Allahın və'di haqdır. Sizi aldatmasın dünya həyatı. Allahın adıyla sizi aldatmasın yalançı şeytan.

6. Sizə düşməndir şeytan, şübhəsiz. Siz də ona düşmən kəsilin. Firqəsini, küfrdaşlarını alov-alov dilimlənən od içinə çağırar şeytan.

7. Şiddətli bir əzab gözləyir kafirlik eləyənləri. Məğfirət gözləyir, böyük bir əcir gözləyir iman gətirənləri, saleh işlər görənləri.

8. Tutduğu pis əməl öz gözünə bərbəzəkli görünən, bu əməli yaxşı iş güman eləyən kəs məgər doğru yolu tutan kəsə taymı tutular? Şübhəsiz, dilədiyini azdırar, dilədiyini doğru yola yönəldər Allah. Sən onların üzündən üzülməyəsən. Onların işləklərini, şübhəsiz, bilir Allah.

9. Küləkləri göndərən, buludları həyəcana gətirən Allahdır. Ölmüş bir ölkəyə sürərik buludları, ölmüş ikən dirildərik torpağı. Dirildərik ölüləri beləcə.

10. İzzət arayıb gəzən kimsə bilməli, bütünlükdə Allaha aiddir izzət. Gözəl sözlər Ona doğru ucalar, bu sözləri qaldırıb Ona doğru ucaldan da düz əməldir. O kəslər ki, hiylə qurub pis işlər törədirlər, şiddətli bir əzab gözləyir onları. Boşa çıxar hiylələri.

11. Torpaqdan, sonra da nutfədən yaratmış sizi və sonra sizi kişilər və qadınlar olaraq var eləmiş Allah. Ondan xəbərsiz hamilə olmaz, doğmaz bir qadın. Birinin uzun ömrü, o birinin qısa ömrü Allahın yazısında yazılmış. Şübhəsiz, Allahın əlində bu çox asan bir işdir.

12. O iki dəniz bir-birinə tay deyil. Şirindir, içməlidir birinin suyu, duzludur, acıdır o birinin suyu. Hər birindən balıq tutub yeyirsiz, bəzək-düzək şeyləri çıxarıb taxırsız. Bir bax, Onun ruzisini qazanasız deyə dalğaları yara-yara necə üzür gəmilər. Bəlkə Ona şükr eləyəsiz?

13. Gecəni gündüzə, gündüzü gecəyə qatır O. Günəşlə ayı tabe eləmiş Özünə, müəyyən bir vaxta qədər hər biri axıb gedər. Rəbbiniz Allah budur. Var olan hər şey Onundur. Ondan başqa kimlərə tapınırsızsa, bir xurma dənəsinə belə sahib deyillər.

14. Eşitməzlər çağırsanız onları. Eşitmiş olsalar belə cavab verməzlər sizə. Qiyamət günü də şərik qoşmağınızı danar onlar, Heç kim sənə hər şeydən xəbərdar Allah kimi olacağın xəbərini bildirə bilməz.

15. Ey insanlar! Möhtacsınız Allaha. Təkcə Allahdır varlı olan, öyülməyə layiq olan.

16. İstəsə sizi aradan götürər, yerinizə başqa xilqət gətirər.

17. Güc olmaz bu Allaha.

18. Başqasının günah yükünü daşımaz heç kim. Yükü ağır günah yiyəsi nə qədər istəsə də bir başqası daşıya onun yükünü, qohumu da olsa belə heç kim bu yükdən bir şey götürməz. Sənin xəbərdarlığın yalnız o kəslərə fayda verər ki, Rəblərini görməyə-görməyə Ondan qorxarlar, namaz qılarlar. Paklanan kimsə yalnız öz xeyrinə paklanmış olur. Allahın dərgahına axır dönəcək hamı.

19. Tay tutulmaz bir-birinə korla görən,

20. qaranlıqlarla aydınlıq,

21. kölgəliklə bürkü.

22. Dirilərlə ölülər də bir deyil. İstədiyi kimsəyə sözünü eşitdirər Allah. Səni isə eşidə bilməz qəbirlərdə olanlar.

23. Sən xəbərdarlıq eləyən bir elçisən sadəcə.

24. Biz səni elçi olaraq haqq ilə göndərmişik müjdə verəsən, xəbərdarlıq eləyəsən. Keçmişin özündə də elə ümmət olmazdı ki, xəbərdarlıq eləyən bir peyğəmbər içində olmayaydı.

25. Səni danırlar, qoy dansınlar. Öncəki nəsillər də danmışdılar onlara aşkar dəlillər, yazılar və nur yayan Kitab gətirmiş peyğəmbərləri.

26. Mən də o kafirləri yaxalamışdım, göstərmişdim onlara necə olur axırı Məni danmağın.

27. Göydən su göndərmiş Allah. Görməzmi oldun bunu? Bununla rəngarəng meyvələr yetirmişik. Biz dağlarda ağa, qırmızıya, sarıya, tünd qaraya, müxtəlif rənglərə çalan iri-iri yollar açmışıq.

28. İnsanları, heyvanları, mal-qaranı da müxtəlif rənglərdə yaratmışıq beləcə. Bəndələri içində Allahdan yalnız üləmalar qorxarlar. Şübhəsiz, güclüdür, günahlardan keçəndir Allah.

29. O kəslər ki, Allahın Kitabını oxuyurlar, namaz qılırlar, verdiyimiz ruzidən gizlində və açıqda Allah yolunda sərf eləyirlər, boşuna getməyəcək alış-verişə ümid bəsləyən kimidir onlar.

30. Onların əcrini verər Allah və Öz lütfündən pay olaraq artırar qazanclarını. Günahlardan keçəndir, qədir-qiymət biləndir O.

31. Bu Kitabda sənə vəhy verdiklərimiz öncəki Kitabları təsdiq eləyən haqq kəlamıdır. Şübhəsiz, bəndələrinin hər işini biləndir, görəndir Allah.

32. Bəndələrimizdən seçdiyimiz kimsələri bu Kitaba varis elədik. Onlardan kimi zülm eləyər özünə, kimi babat davranar, kimi də Allahın iradəsilə hər xeyir işlərdə qabağa düşər. Bu Kitab Onun böyük lütfünün ifadəsidir.

33. Adn cənnətlərinə girər onlar. Qızıldan bilərziklər taxarlar, incilərlə bəzənib-düzənərlər, ipək paltarlar geyərlər orada.

34. «Həmd olsun Allaha, dərd-qəmi bizlərdən uzaq eləmiş. Günahlardan keçəndir, qədirbiləndir Rəbbimiz» deyərlər.

35. «Öz lütfündən pay olaraq əbədiyyət evinə yerləşdirmiş bizi. Buralarda əziyyətə, yorğunluğa düşmərik».

36. Cəhənnəm odu da kafirlərin intizarında. Onlara nə ölüm hökmü verərlər ki, ölələr, nə də yumşaldılar onlara cəhənnəmin əzabı. Beləcə cəzalandırırıq kafir olan hər kəsi.

37. «Rəbbimiz! Çıxar bizi buradan, elədiklərimiz bir yana, başqa işlər, saleh işlər görərik» deyə bağırarlar orada. «Öyüd alasız deyə sizə yetərincə ömür vermədikmi, xəbərdarlıq eləyən o elçi də yanınıza gəlmədimi? Di əzabı dadınız. Zalımlara yardım eləyən tapılmaz» deyərik o zaman.

38. Şübhəsiz, göylərin, yerin görülməzlərini bilir Allah. Yrəklərin içini biləndir O.

39. Odur sizi yer üzünün xəlifələri eləyən. Küfr eləyənin küfrü öz əleyhinə. Kafirlərin küfrü yalnız onlara Rəblərinin qəzəbini artırar. Kafirlərin küfrü yalnız onların ziyanını artırar.

40. De ki, «Allahdan başqa tapındığınız o bütlər ki var, göstərin yer üzündə nəyi var etmiş onlar. Bəlkə göyləri Allahla şərikli yaratmış onlar? Yoxsa onlara Kitab vermişik ki, bu da Onunla şərikliyə aşkar bir dəlil ola?» Yalan və'dlər verər yalnız kafirlər bir-birinə.

41. Allahdır göylərlə yeri məhv olmaqdan saxlayan. Yoxluğa üz tutdumu göylərlə yer, Allahdan başqa heç kəs bunları tutub saxlaya bilməz. Həlimdir, günahlardan keçəndir O.

42. Var gücüylə Allaha and içmişdilər, xəbərdarlıq eləyən bir elçi göndərilsə onlara, doğrudan doğru yolda gedən ümmət olacaqlar ümmətlər içində. Elə ki, o elçi gəldi onlara, nifrətləri bir az da artdı, doğru yoldan bir az da kənar düşdülər.

43. Başladılar yer üzündə təkəbbürlük eləməyə, pis-pis işlər görmək üçün quramalar qurmağa. Bəd niyyətli quramanın toruna tor quranın özü düşər. Öncəki nəsillərin də taleyinə yazılmış qanunları yox, başqa qanunlarımı gözləyir onlar? Dəyişiklik görməzsən Allahın qanununda, başqalaşma görməzsən Allahın qanununda.

44. Bir gəzələr, dolaşalar yer üzünü, baxalar necə olmuş axırı öncəki nəsillərin. Hərçəndi onlardan güclü idi bu nəsillər. Geylərdə və yerdə elə bir şey yoxdur aciz qoya Allahı. Hər şeyi biləndir, hər şeyə qadirdir O.

45. Qazandığı suçlarının qarşılığında insanları dərhal yaxalasaydı Allah, bir canlı da qalmazdı yer üzündə. Ancaq yazılı bir əcələ qədər onlara möhlət verər. Əcəlləri gələn zaman eləyəcəyini eləyər. Bəndələrini görür Allah.