Rəhman və Rəhim Allahın adıyla

1. And olsun sökülən dan yerinə,

2. and olsun on gecəyə [zü-l-hiccə ayının ilk on gecəsinə],

3. and olsun cüt olana, tək olana,

4. and olsun şütüyən gecəyə!

5. Bir ağıl yiyəsinin adına yaraşan andlar deyilmi bunlar.

6. Məgör bilməzmisən Rəbbin nələr eləmiş Ad qövmünə,

7. uca-uca dirəklər tək boy-buxunlu İrəm əhlinə.

8. Onlar kimi məxluq yoxdu heç bir ölkədə.

9. Məgər bilməzmisən Rəbbin nələr eləmiş Vadidə qayalar yonan Səmud qövmünə,

10. öz qurbanlarını çarmıxa çəkən Fir'ona.

11. Azğınlıq eləyərdi ölkədə,

12. çoxlu-çoxlu fitnə-fəsad törədərdi Fir'onun adamları.

13. Əzab qırmancını çəkdi onlara Rəbbin.

14. Şübhəsiz, bəndələrin işlərini izləyir Rəbbin.

15. İnsanı sınaqdan keçirmək üçün sayğı göstərərək ne'mət verdimi ona Rəbbi, «Sayğı göstərmiş mənə Rəbim» deyər.

16. Ancaq yenə də sınaqdan keçirmək üçün ruzisini azaltdımı Rəbbi, «Xor baxmış mənə Rəbim» deyər.

17. Elə deyil. Siz yetimə hörmət qoymayırsız,

18. yoxsulu yedirtməyə meyl eləmirsiz,

19. başqasının haqqına məhəl qoymadan mirasdan təkbaşına yeyirsiz,

20. sərvəti çox sevirsiz.

21. Amma elə ki, yarğan-yarğan yarıldı yer,

22. göldi Rəbbinin əmri və sıra-sıra düzülüb gəldi mələklər

23. və o gün ki, gətirilib gəldi cəhənnəm, anışdırar hər şeyi insan. Bu anışdırmağının da artıq ona nə faydası?

24. Deyər: «Kaş ki, bu günkü həyatım üçün yaxşı işlər görəydim mən öncədən».

25. O gün Allahın əzabı təkin əzab verə bilməz kimsə kimsəyə.

26. Bağladığı zəncirləri Onun kimi heç kim bağlaya bilməz.

27. «Ey öz imanına arxayın can!

28. Dön Rəbbinin dərgahına, sən aldığın savabdan, O da səndən razı.

29. Saleh bəndələrimin sırasına gir.

30. Cənnətimə gir!»