Rəhman və Rəhim Allahın adıyla

1. Əlif ləm mim.

2. Məgər insanlar elə bilirlər təkcə «İman gətirdik» söyləməklə imtahandan çıxacaqlar?

3. Onlardan öncəki nəsilləri də salmışdıq Biz bərkə-boşa. Doğruçuları da, yalançıları da mütləq üzə çıxarar, ayırar bir-birindən onları Allah.

4. Yoxsa pis iş tutanlar elə bilirlər Bizdən yaxa qurtara biləcəklər. Nə pis fikrə düşüblər!

5. Allaha qovuşmağı arzulayan bilməli, Allahın tə'yin elədiyi əcəl mütləq gələcək. O eşidəndir hər şeyi, biləndir hər işi.

6. Cihad eləyən yalnız öz xeyrinə cihad eləyər. Şübhəsiz, aləmlərdən varlıdır Allah.

7. O kəslər ki, iman gətiriblər, saleh işlər görüblər, keçərik onların təqsirlərindən və onların mükafatını gördükləri işlərin ən yaxşısına qarşılıq olaraq verərik.

8. İnsana tövsiyə eləmişik yaxşı olsun atasına, anasına. Və əgər hər ikisi səni qısnasalar ki, bilmədiyin bir şeyi Mənə şərik qoşasan, onlara itaət eləmə. Mənim dərgahıma dönəcəksiz axırı. Və Mən də bildirərəm sizə nə iş tuturdunuzsa.

9. Yaxşıların sırasına salarıq iman gətirənləri, əməli salehləri.

10. İnsanlardan elələri var Allaha iman gətirdik deyərlər. Amma Allah yolunda əziyyətə düşsələr, Allahın verdiyi əzab kimi qavrayarlar çəkdikləri əziyyəti. Mö'minlərə Rəbbindən bir yardım yetişəndə isə onlar Biz sizinlə bir idik deyərlər. Məgər bilmirmi Allah kimlərin ürəyində nələr var?

11. İman gətirənləri də, münafiqləri də mütləq üzə çıxarar, ayırar bir-birindən onları Allah.

12. Kafirlər mö'minlərə «Gəlin bizim yolumuza, günahlarınız da bizim boynumuza» dedilər. Əlbəttə, yalan deyirlər, mö'minlərin günahlarından heç bir şeyi daşıyacaq deyillər.

13. Öz yüküylə bərabər başqa bir yüklə də [mö'minləri yoldan çıxarmaq istədiklərinə görə qazandıqları günahla] yüklənəcəklər. Və qiyamət günü yalanlarına görə sorğuya çəkiləcəklər.

14. Öz qövmünə göndərmişdik Nuhu elçi olaraq. Min ildən əlli il əskik ömür sürdü soydaşları içində. Zalımlıq elədiklərinə görə o tufan yaxaladı onları.

15. Biz də gəmidəkilərlə onu xilas elədik, bunu aləmlərə ibrət elədik.

16. İbrahimi də yada sal. Bir zamanlar öz qövmünə demişdi: «Təkcə Allaha ibadət eləyin, qorxun Ondan. Bilsəniz belə daha yaxşı olar sizin üçün».

17. Allahdan başqaları adına tanrılar olaraq bütlərə tapınırsınız, yalan uydurursunuz. Sizə ruzi verən bunlar deyil. Siz ruzini Allahın dərgahından diləyin, Ona tapının, Ona şükr eləyin. Onun da dərgahına axır dönəcəksiniz.

18. Və əgər Rəsulu danırsınızsa, bilin, sizdən öncəki ümmətlər də danmışdılar göndərilən elçiləri. Hökmləri açıqca bəyan eləməkdir Rəsulun borcu yalnız.

19. Məgər bilməzmidirlər, Allah Öz məxluqunu öncə necə yaradır, sonra onu necə təkrar yaradır. Şübhəsiz, Allahın əlində bu çox asan bir işdir.

20. De ki, «Gəzin, dolaşın yer üzünü, baxın Allah Öz məxluqunu öncə necə yaratmış. Beləcə də axirət evini qurar Allah. Şübhəsiz, hər şeyə qadirdir Allah.

21. İstədiyinə əzab verər, istədiyinə acıyar O. Onun da dərgahına axır dönəcəksiniz.

22. Yerdə də, göydə də aciz qoya bilməzsiniz Allahı. Ondan başqa nə bir dostunuz olar, nə də bir yardımçınız».

23. O kəslər ki, Allahın ayələrinə küfr eləyiblər, Ona qovuşmağı danıblar, rəhmətimdən ümidini üzmüş onlar və ağrılı bir əzab gözləyir onları.

24. Təkcə bunu deyə bildi İbrahimin soydaşları cavablarında: «Öldürün, yandırın onu». Oddan xilas elədi onu Allah. Şübhəsiz, bunda ayələr var iman gətirənlər üçün.

25. «Allahı qoyub bütlərə tapındınız, dünya həyatında mehrinizi onlara saldınız. Qiyamət günü isə bir-birinizi danarsız, bir-birinizə lə'nət oxuyarsız, od içinə girərsiz və yardımsız qalarsız» dedi İbrahim.

26. Lut inandı İbrahimə. «Mən Rəbbimin buyurduğu bir məkana hicrət edirəm. Güclü olan, müdrik olan təkcə Odur» dedi İbrahim.

27. İshaqla Yaqubu da yetirdik İbrahimə, peyğəmbərlik və Kitab bəxş elədik nəslindən olanlara. Dünyada da verdik onun əcrini [bütün dinlərdə adını xatırlatdıq]. Yaxşıların sırasında qalır o axirətdə.

28. Lutu da yada sal. Bir zamanlar öz qövmünə demişdi: «Əxlaqsız işlərə yol verirsiz, sizə qədər aləmlərdən hələ heç kim belə işlər görməmiş.

29. Kişilərlə yaxınlıq eləyirsiz, yol kəsirsiz, məclislərdə fəna işlər görürsüz». Təkcə bunu deyə bildi soydaşları cavablarında: «Doğru sözlü, düz əməlli kimsəsənsə, di gətir Allahın əzabını».

30. «Pozğunçulara qarşı yardım et mənə, Rəbbim» dedi Lut.

31. İbrahimin yanına müjdəylə gəldi elçilərimiz. Dedilər: «Biz yoxa çıxardacağıq bu şəhərin əhlini. Zalımlıq eləməklə məşğuldur onlar».

32. «Onların içində Lut da var axı?» dedi. «Biz yaxşı bilirik kimlər var bu şəhərdə. Lutla ailəsini xilas edərik, təkcə arvadını xilas etmərik. Əzab içində qalacaq o» dedilər.

33. Lutun yanına gəldi elçilərimiz. Onların gəlişinə Lut dilxor oldu, ürəyi sıxıldı. Dedilər: «Qorxma, sıxılma, biz gəlmişik səninlə ailəni xilas eləyək. Yalnız arvadını saxlayarıq əzab içində.

34. Gəlmişik bu şəhərin əhlinə göydən əzab endirək, azmışlar doğru yoldan».

35. O şəhərdən aşkar bir ayə [görk olası xarabalıqlar] qoymuşuq qalıb düşünüb-daşınanlar üçün.

36. Mədyən elinə də göndərdik Biz Şuaybı, onların öz qardaşını elçi olaraq. Dedi: «Ey qövmüm, təkcə Allaha ibadət eləyin, axirət günündən qorxun, yer üzündə pozğunçuluq törətməyin».
37. Dandılar onu. Zəlzələ yaxaladı onları, yurdlarında meyid düşüb diz çökərək qaldılar.

38. Ad və Səmud qövmünü də məhv elədik. Xarabaya çevrilmiş məskənləri bunu nişan verir Bizə. İşləklərini bərbəzəkli göstərmişdi onlara və gözləri görə-görə yoldan çıxarmışdı onları şeytan.

39. Qarunu, Fir'onu və Həməni də məhv elədik. Aşkar dəlillər gətirmişdi onlara Musa. Onlarsa yer üzündə təkəbbürlük edirdilər. Can qurtara bilməzdilər əzabımızdan.

40. Hər birinin cəzasını batdığı günaha görə verməli olduq. Kiminin başına daş yağdırdıq, kimini göy gurultusu məhv elədi, kimini yerə kömdük, kimini suya. Onlara zülm eləyən Allah deyildi, özləri özlərinə eləyirdilər.

41. O kəslər ki, Allahı qoyub ayrı dostlar arayırlar özlərinə, özünə yuva quran hörümçəyə bənzəri var onların. İstisi-soyuğu bilinməyən bir yuvadır hörümçəyin yuvası. Bunu biləydilər kaş.

42. Onu qoyub başqa nəyə tapınarsa onlar, bilir Allah. Güclüdür, müdrikdir O.

43. Bu misalları insanlar üçün çəkirik. Ancaq alim adamlar anlar bunları.

44. Göyləri, yeri haqq olaraq yaratmış Allah. Şübhəsiz, bunda bir ayə var mö'minlər üçün.

45. Sənə vəhy olunanı oxu Kitabdan. Namaz qıl. İnsanı əxlaqsızlıqdan, fənalıqdan qoruyar namaz. Hər şeydən üstündür Allahı anmaq. Gördüyünüz işləri bilir Allah.

46. Kitab əhlindən olan zalım kəslər bir yana, qalanları ilə mübahisə eləyəndə yalnız gözəl sözlər deyin. Deyin: «Bizə nazil olana da, sizə nazil olana da biz iman gətirmişik. Bizim də Tanrımız, sizin də Tanrınız birdir. Biz Ona təslim olmuşuq».

47. Qur'anı da sənə nazil elədik. Kitab verdiyimiz kimsələr inanarlar bu Qur'ana. Bunlardan da [Məkkə əhlindən] iman gətirənlər var Qur'ana. Kafirlərdən savayı kimsə danmaz Bizim bu ayələri.

48. Sən bundan öncə Kitab oxumazdın, sağ əlinlə yazı yazmazdın. Oxusaydın, yazsaydın sənə şəkk gətirərdi batilpərəst adamlar.

49. Elm alan kimsələrin ürəyində aydın-aydın ayələrdən ibarətdir bu Qur'an. Zalım kəslərdən savayı heç kim danmaz Bizim bu ayələri.

50. «Məgər Rəbbi ona göndərməli deyildimi bir mö'cüzə, bir ayə» deyər onlar. De ki, «Mö'cüzələr Allahın dərgahında. Mənsə yalnız öncədən xəbər verənəm olacağı açıqca».

51. Məgər onlara oxunan Kitabı sənə göndərməyimiz bəs deyilmi onlara? Şübhəsiz, bunda bir rəhmət payı var, ibrət var iman gətirənlər üçün.

52. De ki, «Mənimlə aranızda şahid olaraq təkcə Allah yetərlidir. Göylərdə nə varsa, yerdə nə varsa, batilə kim inanırsa, Allahı kim danırsa bilir O». Və itgiyə uğrayanlar da belələridir.

53. Səndən o əzabı tələsik istəyirlər. Əgər öncədən bir əcəl tə'yin edilməsəydi, onlara o əzab dərhal gələrdi. Ancaq yenə qəflətən haqlayacaq onları o əzab. Özlərisə bunu duymaz olarlar.

54. Səndən o əzabı tələsik istəyirlər. Şübhəsiz, kafirləri öz içinə alar cəhənnəm.

55. O gün başları üstündən, ayaqları altından əzab qarsanda onları, «Nə iş görürdünüzsə, onu da dadın» deyər Allah.

56. Ey mö'min bəndələrim! Genişdir yaratdığım yer üzü. Təkcə Mənə ibadət eləyin.

57. Hər bir can dadacaqdır ölümü. Bizim dərgahımıza axır dönəcəksiniz.

58. Və o kəslər ki, iman gətiriblər, saleh işlər görüblər, içindən çaylar axan cənnət mənzillərində yer verərik onlara, oralarda əbədilik qalarlar. Nə gözəl əcir verilər yaxşı işlər görənlərə,

59. o kəslərə ki, səbr göstərərlər, güvənərlər Rəblərinə.

60. Neçə-neçə canlı var ruzisini qazanmağa yox heyi. Onlara da, sizə də ruzini Allah verər. O eşidir hər şeyi, bilir hər şeyi.

61. «Göyləri, yeri yaradan, günəşi, ayı buyruğu altına alan kimdir?» soruşsan «Allahdır!» deyəcəklər. Bəs niyə aldanaraq imandan yayınırlar?

62. İstədiyi kimsəyə ruzini bol-bol verər, istədiyi kimsəyə müəyyən miqdarda verər. Hər şeyi biləndir Allah.

63. «Səmadan su endirən, ölmüş torpağı bu su ilə dirildən kimdir?» soruşsan «Allahdır!» deyəcəklər. De ki, «Həmd edilib öyülməli təkcə Odur». Ancaq anlamayır bunu çoxları.

64. Bu dünya həyatı oyundan, əyləncədən başqa bir şey deyildir. Əsil həyat axirət evindədir. Bunu biləydilər kaş.

65. Gəmiyə minərək yola düşəndən sonra təkcə haqq dininə könül verərək Allaha yalvararlar. Elə ki, onları xilas eləyib quruya çıxardı O, başlayarlar Ona şərik qoşmağa.

66. Qoy hələ küfr eləsinlər onlara verdiyimiz ne'mətə, qoy hələ çəksinlər zövqlərini. Onsuz da görəcəklər bunun sonunu.

67. Ətrafındakılar qırılıb-tökülürkən Biz onların yurdunu [Məkkəni] əmin-amanlıqda olan müqəddəs bir yer elədik. Görməzmi oldular bunu? Batiləmi inanırlar, Allahın ne'mətinimi danırlar?

68. Allahın adına yalan yaxandan, yaxud haqq gəlmiş ikən onu danandan daha zalım kim ola? Kafirlərin yuvası cəhənnəm olmazmı məgər?

69. O kəslər ki, Bizi deyib cihad eləmiş, Bizə doğru gələn yola gətirərik onları. Şübhəsiz, yaxşıların tərəfindədir Allah.