Rəhman və Rəhim Allahın adıyla

1. Səndən qənimətlər barədə soruşarlar. De ki, "Allahındır, Rəsulundur qənimətlər. Qorxun Allahdan, düzəldin aranızı, itaət eləyin Allaha və Onun Rəsuluna əgər mö'minsinizsə!"

2. Mö'minlər o kəslərdir ki, anılan zaman adı Allahın titrəyər ürəkləri, oxunan zaman ayələri onlara ayələr artırar imanlarını və Rəblərinə güvənər onlar.

3. Və o kəslərdir ki, namaz qılar, verdiyimiz ruzidən Allah yolunda sərf eləyər onlar.

4. Belələri əsil mö'min bəndələrdir. Onları rütbələr, məğfirət, bol-bol ruzilər gözləyir Rəblərinin dərgahında.

5. Haqq uğrunda savaş üçün Rəbbin Səni evindən çıxarmışdı, mö'minlərin bə'zisi buna qarşı çıxmışdı.

6. Haqq aşkara çıxandan sonra belə, Səninlə cihad xüsusunda cidal edirdi onlar, gözləri görə-görə ölümə aparırmışlar guya onları.

7. İki dəstədən birini və'd etmişdi sizə Allah. Siz istəyirdiniz silahsız dəstəni ələ keçirəsiz. Allah istəyirdi Öz sözüylə haqqı bərqərar eləsin, kafirlərin kökünü kəssin,

8. haqq üzə çıxsın, batil yoxa çıxsın. Günaha batmışlar buna qarşı çıxsa da.

9. Yardım diləyirdiniz siz Rəbbnizdən. Səsinizə səs verdi O: "Mən sizə bir-birinin ardınca gedən min mələklə yardım edərəm".

10. Allah sizə bu xəbəri qabaqcadan xoş bir mücdə kimi yalnız o məqsədlə yetirdi ki, sakitləşə ürəyiniz. Yardım Allahdan gələr. Güclüdür, müdrikdir Allah.

11. Arxayın salmışdı sizi Alllah, mürgüləyirdiniz. Sizi pak eləmək, şeytan vəsvəsəsindən sizi uzaq eləmək, ürək tellərinizlə sizi bir-birinizə bağlamaq, addımlarınızı möhkəmlətmək üçün üstünüzə köydən su tökürdü Allah.

12. Rəbbin mələklərə vəhy eləyirdi: "Sizin yanınızdayam. Siz mö'minlərə yardım göstərin, Mən də kafirlərin ürəyinə qorxu salaram. Vurun boyunlarını, kəsin barmaqlarını".

13. Allaha və Onun Rəsuluna qarşı çıxmışlar. Allaha və Rəsuluna qarşı çıxanlar bilsinlər, Allahın cəzası şiddətlidir.

14. Di dadın bu cəzanı. Od əzabı gözləyir kafirləri.

15. Ey iman gətirənlər! Bir yığın kafirlə üzləşən zaman baş götürüb qaçmayın.

16. Bir tərəfə çəkilib təkrar savaşmaq, yaxud dəstəyə qoşulmaq üçün deyil, sadəcə qorxudan geriyə çəkilənlər tutularlar qəzəbinə Allahın. Cəhənnəmdir yeri onların. Pisdən pis yerdir ora.

17. Onları siz öldürmədiniz, Allah öldürdü. Atdığın zaman da sən atmamışdın, Allah atmışdı ki, mö'minləri sınaqdan qalib çıxara. Allah, şübhəsiz, eşidəndir hər şeyi, biləndir hər işi.

18. Allahın istəyilə sizə nəsib oldu zəfər. Kafirlərin kələyini beləcə kəsər Allah.

19. Ey kafirlər! Qələbə diləyirdiniz, aldınız payınızı. Sizin üçün daha yaxşı olardı küfrdən əl çəkəydiniz. Yenə başlasanız, biz də bilərik işimizi. Mö'minlərin tərəfindədir, şübhəsiz, Allah.

20. Ey iman gətirənlər!. İtaət eləyin Allaha və Rəsuluna. Qur'anı dinləyə-dinləyə ondan üz döndərməyin.

21. Dinləməyə-dinləməyə "dinlədik" deyənlərə bənzəməyin.

22. Ağılsız lal-karlar heyvanların ən pisindən sayılır Allahın dərgahında.

23. Bir yaxşı cəhət görsəydi onlarda Allah, eşitdirərdi onlara haqqı. Dinləyə-dinləyə də haqdan dönər onlar. Dönükdür əslində onlar.

24. Ey iman gətirənlər! Sizi yaşadan imana çağıran zaman Allahın və Rəsulun çağrışına səs verin. Və bilin, insanın özü ilə ürəyinin arasında durar Allah. Və Onun da hüzuruna axır yığışacaqsız.

25. Qorxun o fitnədən ki, zərbəsi sizlərdən yalnız zalımlıq edənlərə dəyməklə qurtarmayacaq. Və bilin, Allahın cəzası şiddətlidir.

26. Xatırlayın, sayca az idiniz, zəifdiniz yer üzündə bir zaman. Qorxurdunuz sizi əsir alalar. Bəlkə şükr eləyəsiz deyə sığınacaq verdi, yardımıyla güc verdi, təmiz-təmiz şeylərdən ruzilər yetirdi sizə Allah.

27. Ey iman gətirənlər! Xəyanət işlətməyin Allaha və Rəsula. Yoxsa saxladığınız əmanətə xəyanət eləmiş olursuz bilərəkdən.

28. Bilin, mal-dövlətiniz, uşaqlarınızla sınağa çəkər sizi Allah. Allahın dərgahındadır böyük əcir.

29. Ey iman gətirənlər! Qorxun Allahdan. Doğrunu, əyrini ayırd edən bir fəhm versin sizə, yusun günahlarınızı, bağışlasın sizi O. Lütfü böyükdür Allahın.

30. Səni həbs eləmək, yaxud öldürmək, yaxud da qovub didərgin salmaq istəyirdi, sənə hiylə qururdu kafir olan kimsələr. Hiyləyə əl atırdılar, Allah da hiyləsiylə başını qatırdı onların. Ən yaxşı hiyləgərdir Allah.

31. Ayələrimiz onlara oxunan zaman, "Bunları eşitmişik artıq. İstəsək bu cür ayələrdən biz də deyə bilərik. Bunlar köhnə əfsanələrdən başqa bir şey deyildir" deyirdilər.

32. "İlahi, bu Kitab haqq olaraq əgər Səndən gəlibsə, göydən daş yağdır başımıza, yaxud da ağrılı bir əzaba düçar elə bizi" deyirdilər.

33. Sən onların yanında ikən əzab verməzdi onlara Allah, məğfirət diləsəydilər əzab verməzdi onlara Allah.

34. Axı nə səbəbə əzab verməyə Allah bir halda ki, mö'minləri yaxın buraxmır Məscidi harama onlar, heç Ona dost da deyil onlar. Yalnız müttəqilərdir Onun dostları. Ancaq bunu bilməyir çoxu onların.

35. Kə'bə yanındakı namazları da fit çalmaqdan, əl çalmaqdan başqa bir şey deyildi. Kafirlik elədiyinizə görə dadın əzabı!

36. İnsanları doğru yoldan sapdırmaqçün sərf eləyir və eləyər sərvətini kafir olan kimsələr. Xərclədiyi sərvətinin sonra çəkər həsrətini və məğlub olar onlar. Sürüklənib cəhənnəmə doluşar kafir olan kimsələr.

37. Axı, Allah təmizlə murdarı bir-birindən ayırmalı, murdarların hamısını bir-birinin dalınca cəhənnəmə göndərməlidir. Məhz onlardır ziyana uğrayanlar.

38. Kafirlərə de ki, "Savaşdan əl çəksələr, keçmişdəki suçlarından keçilər. Yenə də başlasalar savaşa, gəlib-getmiş olanların başlarına gələnləri gətirərik bunların da başına".

39. Fitnə yox olub təkcə Allahın dini meydanda qalana qədər savaşın onlarla. Savaşdan əl çəksələr, bilsinlər, onların əməllərini, şübhəsiz, görür Allah.

40. Sizdən üz döndərsələr, bilin, Allahdır sizin dostunuz. Gözəl dostdur, yardımçıdır sizə O.

41. Əgər Allaha və haqla batilin aşkara çıxdığı o iki dəstənin üz-üzə gəldiyi gün bəndəmiz Muhammədə nazil olan ayələrə iman gətirdinizsə, bilin, ələ keçirdiyiniz qənimətlərin beşdə biri Allaha, Onun Rəsuluna, Rəsulun qohumlarına, yetimlərə, yoxsullara, yolçulara aid olar. Hər şeyə qadirdir Allah.

42. Siz Mədinəyə yaxın yamacda, onlar da uzaq yamacda idilər. Sizdən aşağıda karvan dayanmışdı. Əgər istəsəydiniz savaş üçün vaxt qoyasız uzanardı söhbətiniz. Siz bir yana, ancaq Allahın hökmüylə olan oldu: ölən öldü, qalan qaldı, üzə çıxdı nazil olan aşkar dəlil. Allah, şübhəsiz, eşidəndir hər şeyi, biləndir hər işi.

43. Sənə yuxunda sayca az göstərmişdi onları Allah. Çox göstərsəydi əgər, savaşdan çəkinərdiniz, bir-birinizlə çəkişərdiniz. Ancaq salamat qurtardı sizi Allah. Yrəklərdə gizlənəni bilir Allah.

44. Yz-üzə gəldiyiniz zaman gözünüzə sayca az göstərmişdi onları O. Sizin də sayınızı onların gözündə azaltmışdı Allah vermək üçün olacağın əmrini. Allaha qalar işlər.

45. Ey iman gətirənlər, bir dəstəylə üz-üzə gələn zaman səbatlı olun, Allahı çox anın ki, uğura uğrayasız.

46. İtaət eləyin Allaha və Rəsuluna. Bir-birinizlə çəkişməyin, yoxsa uduzarsınız, taqətdən düşərsiniz. Səbrli olun, səbrlilərin tərəfindədir Allah.

47. Yurdlarından təkəbbürlə, nümayişkəranə çıxanlara, adamları Allah yoluna qoymayanlara oxşamayın. Onların hər işini bilir Allah.

48. Gördükləri işləri bərbəzəkli göstərmişdi onlara şeytan. "Bir kimsə qalib gələ bilməz sizə bu gün, sizə arxadaşam mən" demişdi o. İki dəstə üz-üzə gələn zaman qaçmağa üz tutaraq "Mən sizdən deyiləm, sizin görmədiyinizi mən görürəm, mən Allahdan qorxuram, Allahın cəzası şiddətlidir" demişdi o.

49. "Dinləri aldatmış bunları" deyirdi münafiqlər və ürəyi azarlılar. Allaha güvənən kəs bilsin, güclüdür, müdrikdir, şübhəsiz, Allah.

50. Görəydin can verən zaman necə əziyyət çəkir kafir olan kimsələr. Önündən, arxasından mələklər onları vuraraq deyirlər: "Dadın yanğın əzabını.

51. Öz əlinizlə gördüyünüz işlərin cəzasıdır bu. Yoxsa bəndələrə əsla zülm eləməz Allah".

52. Bunlar da Fir'on ailəsi və ondan öncəkilər kimi davranmışdılar, onlar da Allahın ayələrini danmışdılar. Və günahlarına görə götürmüşdü aradan onları Allah. Şübhəsiz, güclüdür Allah, şiddətlidir Onun cəzası.

53. Bir qövmə verdiyi ne'məti başqa şeyə dəyişdirməzdi Allah, dəyişilməz qalsaydı əgər onların özü. Allah eşidəndir hər şeyi, biləndir hər işi.

54. Bunlar da Fir'on ailəsi və ondan öncəkilər kimi davranmışdılar, onlar da Rəblərinin ayələrini danmışdılar. Və günahlarına görə məhv etmişdik onları, qərq etmişdik sulara Fir'on ailəsini. Zalımlardı hamısı.

55. Kafirlik eləyənlər heyvanların ən pisindən sayılır Allahın dərgahında. İmana gəlməz onlar.

56. Bunlar o kəslərdir ki, Sənə əhd eləmişdilər və hər dəfə də Allahdan çəkinmədən əhdlərini pozurdular.

57. Savaş vaxtı yaxalasan onları verəcəyin cəza ilə dallarınca gedənləri də pərən-pərən sal ki, bəlkə bundan ibrət alalar.

58. Bir qövmün öz əhdinə xəyanətindən əndişələnirsənsə əgər, verdiyi əhdini insafla qaytar onlara [ləğv elə aranızdakı razılaşmanı]. Xainləri sevməz Allah.

59. Kafirlər elə bilməsinlər ki, keçən keçdi və keçməzlər əlinizə bir daha. Aciz qoya bilməz sizi onlar.

60. Qüvvəniz yetən qədər qüvvə yığın, savaş atlarını hazır saxlayın ki, bununla qorxuya salasız Allahın və sizin düşməninizi və başqalarını, sizin tanımadığınız, Allahın tanıdığı düşmənləri. Allah yolunda nə xərcləsəniz bilin, özünüzə qaytarılar hər bir şeyin əvəzi.

61. Barışığa gəlsələr sən də gəl və təvəkkül elə Allaha. O, şübhəsiz, eşidəndir hər şeyi, biləndir hər işi.

62. Aldatmaq fikrinə düşsələr səni, bil, sənə yardım üçün təkcə Allah yetərlidir. Odur Öz gücüylə, mö'minlərlə sənin yardımına yetişən,

63. mö'minləri bir-birinə bağlayan. Yer üzündə nə varsa hər şeyi sərf eləsəydin belə bağlaya bilməzdin onları bir-birinə. Ancaq Allah bağlayar onları bir-birinə. Güclüdür, müdrikdir O.

64. Ey Peyğəmbər! Sənə və sənə tabe olan mö'minlərə yardım üçün təkcə Allah yetərlidir.

65. Ey Peyğəmbər! Təşviq elə mö'minləri savaşa. Sizdən iyirmi nəfər səbri olan onların iki yüzünə güc gələr. Sizin yüzünüz kafirlərin mininə bəs eləyər. Çünki bunlar anlamaz bir qövmdür.

66. İndi yükünüzü azaltdı Allah. İçinizdəki zəiflikdən Onun xəbəri vardı. Sizdən yüz nəfər səbri olan onların iki yüzünə, mininiz onların iki mininə güc gələr. Səbrlilərin tərəfindədir Allah.

67. Yer üzündə axırına çıxmayınca düşmənin əsir sahibi olmaq yaraşmaz Peyğəmbərə. Siz bu dünyanın gəldi-gedərini, Allah da sizin üçün axirəti arzulayır. Güclüdür, müdrikdir Allah.

68. Öncədən olmasaydı Allahın yazısı [qəsdsiz verilən səhv hökmlərə görə cəzasız qalmaq barədə] fidyə aldığınıza görə o böyük əzaba mütləq düçar olardınız.

69. Ələ keçirdiyiniz qənimətlərin halalını, təmizini yeyin və qorxun Allahdan. Şübhəsiz, günahlardan keçəndir, Rəhimdir Allah.

70. Ey Peyğəmbər! Əliniz altında olan əsirlərə de ki, "Allah bilsə ki, xoş niyyət gizlənib ürəyinizdə sizdən alınandan daha yaxşısını qaytarar sizə və keçər suçunuzdan. Bağışlayandır, Rəhimdir Allah".

71. Sənə xəyanət eləmək istəsələr demək öncə Allaha xəyanət eləmişlər. Və Allah imkan verər elədiyini eləyəsən onlara. Hər şeyi biləndir, müdrikdir Allah.

72. O kəslər ki, iman gətirdilər, hicrət etdilər, Allah yolunda mallarıyla, canlarıyla cihad etdilər və o kəslər ki, hicrət edənlərə sığınacaq verdilər, yardım göstərdilər, bir-birinin dostudur onlar. O kəslər ki, iman gətiriblər, ancaq hicrət etməyiblər, payınız olmaz sizin onların dostluğundan [mirasından] nə qədər ki, hicrət etməyib onlar. Yalnız din uğrunda sizdən yardım diləyərlərsə, yardım etməlisiz onlara. Ancaq əhd bağladığınız bir qövmün əleyhinə olmamalı bu yardım. İşləklərinizi görür Allah.

73. Bir-birinə arxadır kafir olan kimsələr. Siz də əməl etməsəniz Rəbbinizin əmrinə, fitnə düşər yer üzünə, böyük fəsad alıb gedər hər yeri.

74. O kəslər ki, iman gətirdilər, hicrət etdilər, Allah yolunda cihad etdilər və o kəslər ki, hicrət edənlərə sığınacaq verdilər, yardım göstərdilər, məhz onlardır həqiqətən mö'min olan bəndələr. Məğfirət, bol-bol ruzi gözləyir onları.

75. O kəslər ki, sonradan gəliblər imana, hicrət ediblər və sizinlə bərabər cihad ediblər, onlar da sizdəndir. O kəslərin ki, arasında qohumluq bağı var, Allahın Kitabına görə onlar bir-birinə daha çox bağlı olar. Biləndir hər işi, şübhəsiz, Allah.