Rəhman və Rəhim Allahın adıyla

1. Ey Peyğəmbər! Qorx Allahdan. Üz göstərmə kafirlərə, münafiqlərə. Şübhəsiz, hər şeyi biləndir, müdrikdir Allah.

2. Tabe ol Rəbbindən sənə gələn vəhylərə. Gördüyünüz işlərdən xəbəri var Allahın.

3. Güvən Allaha. Allahın vəkilliyi hər şeyə yetərlidir.

4. Allah Heç bir kişinin sinəsində iki ürək yaratmamış. «Sən mənə anamın kürəyi kimisən» deyə xitab etdiyiniz zövcənizi sizə ana eləməmiş, oğulluğa götürdüyünüz kimsəni sizə oğul eləməmiş. Bunlar mə'nasız sözlərdir çıxar sizin ağzınızdan. Haqq sözü Allah deyər, adamları haqq yoluna O yönəldər.

5. Öz atasının adıyla çağırın oğulluğa götürdüyünüz kimsəni. Bu daha ədalətli bilinər Allahın dərgahında. Atasının kimliyini bilməsəniz, onda onu din qardaşınız və qohumunuz kimi qəbul eləyin. Bilmədən səhv eləmək günah deyil, bilərəkdən səhv eləmək günahdır. Günahlardan keçəndir, Rəhimdir Allah.

6. Mö'minlərə özlərindən daha çox Peyğəmbər yaxın olar. Onların analarıdır Peyğəmbərin zövcələri. Allahın yazısına görə qohumlar bir-birinə mö'minlərdən, mühacirlərdən daha yaxındır vərəsəlik baxımından. Sərvətinizdən dostlara da vəsiyyətlə miras qoya bilərsiz. Bunların hamısı Kitabda yazılmış.

7. Peyğəmbərlərlə əhd bağlamışdıq. Səndən, Nuhdan, İbrahimdən, Musadan, Məryəm oğlu İsadan çox ciddi bir əhd almışdıq.

8. Almışdıq ki, doğru sözlü, düz əməlli kimsələrlə doğruluğu, düzgünlüyü barədə sorğu-sual etsin Allah və ağrılı bir əzab hazırlasın kafirlərə.

9. Ey iman gətirənlər! Anın Allahın sizə olan ne'mətini. Əsgərlər gəlmişdilər üstünüzə [Mədinədə baş vermiş «Xəndək döyüşü» adlanan hadisə nəzərdə tutulür]. Küləyi göndərmişdik, sizin görmədiyiniz əsgərləri göndərmişdik üstlərinə. Nə iş görürdünüzsə görürdü Allah.

10. Almışdılar üstünüzü yuxarıdan, aşağıdan. Bulanmışdı gözləriniz qorxudan, ürəyiniz gəlmişdi ağzınıza. Allahın barəsində nələr düşünmürdünüz.

11. Bərkə çəkilmişdi, şiddətli bir sarsıntıya uğramışdı mö'minlər.

12. «Allahın və Rəsulunun bizə verdiyi və'd batil imiş» deyirdi münafiqlər, ürəyi azarlılar.

13. «Ey Yəsrib əhli! Daha burda qalmağa sizin bir yeriniz yox. Qayıdın!» demişdi onlardan bə'ziləri. Bə'ziləri də «Evimiz açıq qalmış düşmən üzünə» deyərək Peyğəmbərdən rüsxət istəyirdilər çəkilələr arxaya. Açıq deyildi evləri, savaş meydanından qaçmaq istəyirdilər.

14. Gələnlər Mədinənin ətrafından gəlsəydilər və münafiqləri üsyana, küfrə səsləsəydilər çox keçməzdi qoşulardı münafiqlər onlara.

15. Bir az öncə isə Allaha and vermişdilər geriyə döndü yoxdur. Sorğuya çəkilərlər Allahın dərgahında verdikləri anda görə.

16. De ki, «Ölümdən, qətldən qaçırsınızsa, bilin, qaçmağınız sizə fayda verməyəcək. Qaçsanız da az bir müddət qalarsınız dünyada».

17. De ki, «Bir pislik, ya yaxşılıq yetirmək istəsə sizə Rəbbiniz, kimdir alan qarşısını Allahın iradəsinin? Allahdan başqa da nə bir dost tapılar, nə bir yardımçı sizə».

18. O kəslər ki, cihada getməkdən sizi yayındırırlar və dindaşlarına «Bizimlə olun» deyirlər, onları tanıyır Allah. Yalnız az-az qoşular cihada onlar.

19. Sizə yardım göstərəndə xəsislik eləyərlər. Elə ki, ürəyini qorxu sardı onların, baxa-baxa qalarlar sənin üzünə. Ölümdən bayılacaq kimsələr təkin gözləri oynayar hədəqəsindən. Elə ki, aradan qalxdı qorxu, qənimət iddiasında olub öz iti dilləriylə sizi incidərlər. Onların işlərini batil eləmiş Allah. Allahın əlində bu çox asan bir işdir.

20. Qorxu içində elə bilərlər hələ çıxıb getməmiş düşmən dəstələr. Bu dəstələr əgər bir də qayıtsalar üstlərinə, düşünərlər bədəvilərin yanında kaş olalar və başınıza gələnləri də bədəvilərdən öyrənələr. Aranızda olsalar da az-az savaşar onlar.

21. Allahın Rəsulu ən gözəl nümunədir sizin üçün. Allaha və axirət gününə qovuşmağı diləyənlər üçün. Allahı çox ananlar üçün.

22. Düşmən dəstələrini mö'minlər görən zaman, «Bu, Allahın və Rəsulunun bizə və'd elədiyidir. Allah və Rəsulu doğru söyləmişlər bizə» deyərlər. Bu daha da artırar imanlarını, Ona itaətlərini.

23. Mö'minlərin içində kişilər var, Allaha verdikləri əhdlərinin üstündə durmuş onlar. Kimisi bu yolda canını vermiş, kimisi də hələ gözləməkdədir. Əhdlərini heç vaxt pozmamış onlar.

24. Doğru sözlü, düz əməlli kəslərə doğruluğun qarşılığı olaraq mükafat verər Allah. Münafiqlərə də istəsə əzab verər, istəsə də tövbəsini qəbul edər onların. Günahlardan keçəndir, Rəhimdir Allah.

25. Kafirləri hikkələriylə birgö geriyə qaytardı Allah. Bir xeyir qazanmadılar. Allah Özü kömək oldu mö'minlərə savaşda. Qüvvətlidir, güclüdür Allah.

26. Kitab əhlindən olub kafirlərə yardım edən kəsləri vuruşduğu qalalardan aşağı saldı, ürəyinə qorxu saldı onların. Kimini öldürür, kimini də əsir alıb aparırdınız.

27. Yerlərinə, yurdlarına, mallarına və ayağınız dəyməyən başqa torpaqlara sizi varis elədi O. Hər şeyə qadirdir Allah.

28. Ey Peyğəmbər! Zövcələrinə de ki, «Əgər dünya həyatını, onun zər-ziynətini sevirsinizsə, onda gəlin mən sizin talağınızı lazımi qaydada, gözəl bir şəkildə verim azad olun.

29. Əgər Allahı, Rəsulunu və axirət evini sevirsinizsə, bilin, içinizdəki yaxşılara böyük bir əcir hazırlamış Allah».

30. Ey Peyğəmbər qadınları! Sizin hansı biriniz əxlaqsızlıq eləyərsə açıqca, ikiqat artıq olar onun əzabı. Allahın əlində bu çox asan bir işdir.

31. Sizin hansı biriniz Allaha və Rəsuluna itaətdə olarsa, saleh bir iş görərsə, əcrini ikiqat verərik. Beləsinə bolluca ruzilər hazırlamışıq.

32. Ey Peyğəmbər qadınları! Siz başqa qadınlar kimi deyilsiniz. Allahdan çəkinirsizsə, demək daha üstünsünüz. Danışanda yumşalmayın, yoxsa pis şeylərə ümidli olar ürəyi azarlı kəs. Ciddi və aydın danışın həmişə.

33. Evlərinizdə oturun. Erkən cahiliyyə çağında olduğu sayaq bəzənib-düzənərək ətrafa açılıb-saçılmayın. Namaz qılın, zəkat verin, Allaha və Rəsuluna itaət eləyin. Allah istəyir sizdən - Peyğəmbər əhlindən çirkinliyi uzaq eləyə, sizi hər cür eyblərdən tərtəmiz təmizləyə.

34. Evinizdə oxunan Allahın ayələrini yadınızda saxlayın. Həssasdır, hər şeydən xəbərdardır Allah.

35. Müsəlman, mö'min, itaətkar, doğrucul, səbrli, təvazökar, sədəqə verən, oruc tutan, namusunu qoruyan, Allahın adını tez-tez anan kişilərə, qadınlara məğfirət və böyük bir əcir hazırlamış Allah.

36. Allahın və Rəsulunun hökmünə xilaf olaraq başqa yol seçə bilməz öz işində mö'min kişi, mö'min qadın. Allaha və Rəsuluna baş qaldıran kəs açıqdan-açığa sapmış yolundan.

37. Allahın ne'mət verdiyi və sənin də bu ne'məti yetirdiyin kimsəyə «Zövcəni boşama, saxla onu, qorx Allahdan» deyirdin və Allahın bildirəcəyi şeyi içində gizlədirdin, adamlardan çəkinirdin. Daha yaxşı olardı Allahdan çəkinəsən. Və axır zövcəsiylə birdəfəlik üzülüşən zaman Zeyd, o qadını Biz sənə ərə verdik. Verdik ki, oğulluqları zövcələrini boşayandan sonra bunlarla mö'minlər evlənsələr batmasınlar günaha. Yerinə yetəndir əmri Allahın.

38. Allahın Peyğəmbərə halal bildiyi şeydə günah iş ola bilməz. Allahın bu qanunu öncəki peyğəmbərlərə də aid idi. Yerinə yetəcəyi öncədən bəlli olan bir qərardır Allahın əmri.

39. Allahın göndərişlərini təbliğ eləyən kimsələr qorxarlar Ondan. Allahdan başqa heç kimdən qorxmazlar. Allahın hesabı hər şeyə yetərlidir.

40. Sizlərdən bir kəsin atası deyil Muhamməd. O Allahın Rəsuludur, peyğəmbərlərin sonuncusudur. Hər şeyi biləndir Allah.

41. Ey iman gətirənlər! Tez-tez anın Allahı.

42. Səhər-axşam öyün Onu.

43. Sizə rəhmət verən Odur, sizinçün məğfirət diləyən Onun mələkləridir. O istəyir qaranlıqlardan aydınlığa çıxasız. Mö'minlərə qarşı Rəhimdir O.

44. Allahla görüşən gün Ondan təmənnaları yalnız «Salam» olacaq. Bol-bol ruzilər hazırlamış onlara Allah.

45. Ey Peyğəmbər! Biz səni göndərmişik şahidlik edəsən, mö'minlərə cənnətləri müjdə verəsən, kafirləri cəhənnəmlə qorxuzasan, 46. Onun izniylə Allahın yoluna səsləyəsən hamını, insanlara nur paylayan çıraq olasan.

47. Mö'minlərə müjdə ver, Allahın dərgahında böyük bir fəzilət gözləyir onları.

48. Yz göstərmə kafirlərə, münafiqlərə. Onların verdikləri əziyyətdən üzülməyəsən. Allaha güvən. Allahın vəkilliyi hər şeyə yetərlidir.

49. Ey iman gətirənlər! Evləndiyiniz mö'min qadınları boşayan zaman onlarla təmasda olmamısınızsa, iddəsini [boşanmış qadınların təkrar ərə getmək üçün gözləməli olduqları üç aybaşı müddəti] gözləmək vacib deyil onlara. Verəcəyinizi verib razı salın, sonra gözəl bir tərzdə azad buraxın onları.

50. Ey Peyğəmbər! Mehir kəsib verdiyin zövcələrini, Allahın sənə cihad zamanı qənimət olaraq yetirdiyi cariyələri, səninlə birgə hicrət eləmiş əmin, bibin, dayın, xalan qızlarını və Peyğəmbər eşqinə öz mehrindən keçib ona bağlanan və Peyğəmbərin də almaq istədiyi mö'min bir qadını - bu təkcə sənə aiddir, digər mö'minlərə aid deyildir - Biz sənə halal etmişik. Etmişik ki, mö'minlərin zövcələri, cariyələri barədə nələri vacib bildiyimizi biləsən, bir qərar verəndə çətinliyə düşməyəsən. Günahlardan keçəndir, Rəhimdir Allah,

51. Zövcələrindən kiminin növbəsini istəsən tə'xirə sal, kimini də istəsən yanına al. Kənar olduğun zövcələrindən də istədiyini yenə çağırsan yanına batmazsan bir günaha. Onlara gözaydınlığı üçün belə etsən daha yaxşı. Gərək heç üzülməyələr, hər birinə verdiyindən razı qalalar. Yrəyinizdə nə varsa bilər Allah. Hər şeyi biləndir, həlimdir Allah.

52. Cariyələrin bir yana, başqa qadınlar xoşuna gəlsələr belə halal bilinməzlər sənə. Zövcələrini boşayıb onları almaq da sənə yaraşan deyil. Hər şeyə göz olar Allah.

53. Ey iman gətirənlər! İcazəsiz, yaxud da yeməyə də'vət olunmamışkən Peyğəmbərin evinə girməyəsiz. Də'vət olunanda da vaxtından əvvəl getməyin ki, gözləməli olmayasız yeməyi. Gedəndə vaxtında gedin, yeyəndən sonra da dağılışın. Söhbət üçün oturub qalmayın. Peyğəmbəri üzsə də bu, sizə bir söz deməkdən çəkinər. Allah isə gerçəyi deməkdən çəkinən deyil. Peyğəmbərin zövcələrindən əgər bir şey istəsəz, bunu pərdə arxasından istəyin. Belə olan surətdə sizin də, onların da ürəyi təmiz qalar. Sizə heç yaraşan deyil Allahın Rəsulunu incidəsiz, ondan sonra zövcələrilə evlənəsiz. Çox böyük günah sayılar Allahın dərgahında bu.

54. Nəyi bəyan etsəniz də, nəyi gizləsəniz də bilin, şübhəsiz, hər şeyi biləndir Allah.

55. Ataları, oğulları, qardaşları, qardaşlarının oğulları, bacılarının oğulları, xidmətçi qadınlar və cariyələrinin yanında hicabsız olsalar bir günaha batmaz qadınlar. Qorxun Allahdan. Hər şeyə şahiddir Allah.

56. Peyğəmbərə salavat göndərər Allah və mələkləri. Ey iman gətirənlər! Siz də ona salavat gətirin!

57. O kəslər ki, incidirlər Allahı və Rəsulunu, dünyada və axirətdə onları lə'nətləmiş Allah. Alçaldıcı bir əzab hazırlamış onlara.

58. O kəslər ki, görmədikləri işə görə nahaqdan incidirlər mömin kişilərlə qadınları, böhtan atır, açıqdan-açığa bir günaha batır onlar.

59. Ey Peyğəmbər! Zövcələrinə, qızlarına və mö'minlərin qadınlarına de ki, bir yerə çıxarkən örtüyə bürünsünlər. Belə daha yaxşı olar, nəcib bilərlər onları, əziyyət verməzlər onlara. Günahlardan keçəndir, Rəhimdir Allah.

60. Münafiqlər, ürəyi azarlılar, Mədinədəki şayiəbazlar gördükləri işlərindən çəkinməsələr səni onların üstünə salarıq. Və daha sənin yanında da çox qala bilməz onlar.

61. Lə'nətlənmiş kimsələr harda olsalar yaxalarlar, öldürərlər onları.

62. Öncəki nəsillərə də aiddi Allahın bu qanunu. Allahın qanunu heç zaman dəyişən deyil.

63. Səndən soruşsalar «Qiyamət nə vaxt qopacaq?» de ki, «Bunu təkcə Allah bilər. Ancaq nə biləsən, bəlkə elə yaxındadır qiyamət».

64. Allah lə'nət eləmiş kafirlərə, alov-alov dilimlənən bir od hazırlamış onlara.

65. Od içində əbədilik qalarlar, nə bir dost tapılar, nə də bir yardım eləyən onlara.

66. Yzləri od içində yanıb çevrilən gün «İtaət eləyəydik Allaha, Rəsula kaş» deyərlər.

67. «Rəbbimiz! Ağalarımıza, böyüklərimizə itaət eləmişdik. Onlar bizi yolumuzdan azdırmışdılar» deyərlər –

68. «Rəbbimiz! İkiqat əzaba sal, böyük bir lə'nətə düçar elə onları».

69. Ey iman gətirənlər! Musanı incidənlərə tay olmayınız. Onu töhmətlərdən uzaq eləmiş Allah. Allahın yanında möhtərəm bir peyğəmbərdi o.

70. Ey iman gətirənlər! Qorxun Allahdan, danışanda düz danışın.

71. İşinizi düzəldər, suçunuzdan keçər O, Allaha və Rəsuluna itaətdə olan kəs böyük bir qurtuluşa çatmış deməli.

72. Göylərə, yerə və dağlara təklif elədik əmanəti [cavabdehliyi] götürsünlər boyunlarına. Götürmək istəmədilər, qorxdular. İnsan isə götürdü öz boynuna bu əmanəti. Zalımdı, cahildən cahildi o.

73. Və buna görə də münafiq kişilərlə qadınlara və bütpərəst kişilərlə qadınlara əzab verəcək Allah. Mö'min kişilərlə qadınların tövbəsini qəbul buyuracaq. Günahlardan keçəndir, Rəhimdir Allah.