Rəhman və Rəhim Allahın adıyla

1. Ha mim.

2. Güclü, müdrik olan Allah nazil eləmiş bu Kitabı.

3. Yalnız haqq olaraq yaratmışıq yazılı bir əcələ qədər dövran sürəcək göyləri, yeri, bunların arasında olanları. Kafirlərsə xəbərdarlıq olaraq bildirilən olacağı danmaqdadırlar hələ.

4. Görmüsünüzsə əgər, bir Mənə də göstərin nələri yaratmış yer üzündə Allahı qoyub tapındığınız o bütlər? Yoxsa göylərimi Allahla şərikli yaratmış onlar? Doğru sözlü, düz əməlli kimsələrsinizsə, Qur'andan öncə bir kitabınız varsa gətirin, atalarınızdan nə elminiz qalıbsa bildirin Bizə.

5. Allahı qoyub qiyamətə qədər dualara cavab verməyəcək şeylərə dua eləyən kimsədən daha çox kim sapmış ola? Xəbərsizdir dualardan bu şeylər.

6. İnsanlar məhşərə çəkilən zaman, düşmən kəsilər onlara bütlər, insanların ibadətini danar bütlər.

7. Ayələrimiz açıqlanıb oxunan zaman, haqqı görən kimi danan kəslər «Aşkar bir cadudur bu» deyərlər.

8. Yaxud da «Bunu uydurmuş o» deyərlər. De ki, «Bunu uydurmuşamsa, Allahın qəzəbindən məni qurtara bilməzsiniz. Allah daha yaxşı bilir siz Qur'an barəsində nələr sayıqlayırsız. Tək Allahın şahidliyi yetərlidir mənimlə aranızda. Günahlardan keçən, Rəhim olan təkcə Odur».

9. De ki, «Mən göndərilmiş elçilərin ilki deyiləm. Nə mənim öz başıma, nə sizlərin başına bilmərəm nələr gələcək. Yalnız mənə vəhy edilənə tabe olaram. Mən yalnız açıq-aşkar xəbərdarlıq eləyənəm».

10. De ki, «Allahın dərgahından göndərilmişsə bu Kitab və siz də bunu danırsızsa, İsrail oğullarından bir şahid şəhadət vermişsə ki, Allahın dərgahından gəlmiş bu Kitab və buna iman gətirmişsə, siz də təkəbbürlü-təkəbbürlü bundan üz döndərirsizsə, deyin özünüzə yazığınız gəlmirmi? Zalımları doğru yola yönəltməz Allah».

11. Kafirlər mö'minlərə dedilər: «İslam yaxşı din olsaydı, ona iman gətirməkdə biz qabağa düşərdik. «Doğru yolda deyillər deyə «Bu, köhnə bir yalandır» deyərlər.

12. Qur'andan öncə Musanın Kitabı rəhbərlik eləyərdi mö'minlərə. Öncəki Kitabları ərəbcə təsdiq eləyər bu Qur'an. Zalımlara xəbərdarlıq eləyər, yaxşılara müjdə verər bu Qur'an.

13. O kəslər ki, «Rəbbimiz Allahdır» deyəndən sonra düzəliblər düz yola, zaval yoxdur onlara, üzülməzlər qəm əlindən.

14. Cənnət əhlidir onlar, gördükləri işlərinə qarşılıq olaraq orada əbədilik qalarlar.

15. İnsana buyurmuşuq yaxşı olsun atasına, anasına. Əziyyətlə daşımış bətnində, əziyyətlə doğmuş onu anası. Onun ana bətnində daşınması və sonra süddən kəsilməsi otuz ay sürər. Və axır yetkinlik çağına [otuz - otuz üç yaşına] yetdimi, yetişdimi qırxına, «Rəbbim! Elə elə ki, mənə verdiyin, atama, anama verdiyin ne'mətə görə Sənə şükr eləyə bilim, razı qalacağın yararlı bir iş görə bilim. Nəslimi-soyumu da əməli salehlərdən elə. Yzümü Sənə tutmuşam, Sənə təslim olmuşam» söyləməli.

16. Belələri o kəslərdir ki, gördükləri işlərinin yalnız ən yaxşısını qəbul buyurmuşuq, onlara verilmiş doğru və'də görə keçmişik pis işlərindən, cənnətlik eləmişik onları,

17. Atasına, anasına «Uf sizin əlinizdən! Məni qəbirdən çıxıb diriləcəyimləmi qorxuzursuz? Axı məndən öncə neçə-neçə nəsillər yoxa çıxmış, dirilməmiş» deyən övladın sözləri mütəəssir eləyər ata-ananı. Allaha sığınaraq deyərlər: «Yazıqlar olsun sənə. Şübhəsiz, haqq olar və'di Allahın, inan buna». Övladsa yenə deyər: «Öncəki nəsillərin əfsanələrindən başqa bir şey deyil bu».

18. Bir zaman cinlərdən və insanlardan ibarət ümmətləri yaxalamışdı Allahın dediyi o əzab. İtkiyə uğramışdılar.

19. Hər kəsin gördüyü işlərə görə öz məqamı var. Hərəyə öz işlərinə görə Allah dərgahında verilər əvəz. Heç kimin haqqında bir haqsızlıq edilməz.

20. Kafirlərə cəhənnəm odu göstərilən gün deyilər: «Dünya həyatınızda sizinçün gözəl olan nə vardısa, başa vurdunuz, hər ləzzətdən doyunca barındınız. Bu gün isə alçaldıcı əzaba düçar olacaqsınız. Haqsız yerə yer üzündə təkəbbürlük edirdiniz, yolunuzdan azırdınız».

21. Ad qövmünün qardaşları Hudu an bu Qur'anda. Əhqaf yurdundakı [Yəmən] qövmünə xəbərdarlıq eləmişdi bir zaman. «Təkcə Allaha ibadət eləyin» deyən neçə-neçə elçilər gəlib getmişdilər ondan öncə də, sonra da. «Qorxuram o böyük günün əzabına uğrayasız» demişdi öz qövmünə.

22. «Gəlmisən bizi tanrılarımızdan ayırasan? Doğru sözlü, düz əməlli kimsəsənsə, bizi qorxuzduğun şeyi başımıza gətir» dedilər.

23. «Bunun nə zaman gələcəyini təkcə Allah bilir, şübhəsiz. Mən yalnız mənimlə göndəriləni sizə çatdırıram. Və mən sizi cahil görürəm» dedi.

24. Görəndə ki, göy üzünü tutan bir bulud gəlir, yönəlir onların vadiləri səmtinə, dedilər: «Yağış yağdıracaq bizə bu bulud». Hud dedi: «Xeyr, bu sizin tələsdirdiyiniz şeydir, sizə ağrılı bir əzab daşıyan küləkdir,

25. öz Rəbbinin əmri ilə məhv eləyər hər şeyi». Viran olmuş evlərindən savayı heç nə gözə dəyməyirdi sübh açılanda. Beləcə cəzalandırarıq günah yiyələrini.

26. Sizə yer vermədiyimiz yerlərdə yerləşdirmişdik onları. Qulaqlar, gözlər, ürəklər vermişdik onlara. Onların karına da gəlmədi ki, gəlmədi nə qulaqları, nə gözləri, nə ürəkləri. Danmışdılar Allahın ayələrini. Haqladı onları lağa qoyduqları şeylər.

27. Ətrafınızdakı neçə-neçə şəhərləri məhv eləmişik və ayələri birər-birər açıqlamışıq ki, bəlkə haqq yoluna dönə adamlar.

28. Allahı bir yana qoyub Ona yaxınlaşmaq üçün tapındıqları tanrıları yardım göstərməli deyildimi onlara? Ancaq tanrıları onlardan itib getdilər. İnsanları Allaha yaxınlaşdıran tanrılar deyildi bütlər, bu yalan idi, onların uydurması idi.

29. Cinlərdən bir neçəsini [bə'zi yəhudi qəbilələri nəzərdə tutulur] sənə tərəf gətirmişdik Qur'ana qulaq verələr. Onu dinləməyə başlayan zaman, «Susun!» dedilər bir-birinə. Qur'an oxunub qurtaran kimi qayıtdılar xəbərdarlıq eləsinlər qövmlərinə.

30. Dedilər: «Ey qövmümüz, biz bir Kitab dinlədik. Musadan sonra nazil olmuş, öncəki Kitabları təsdiq eləyir, haqqa yönəldir, doğru yola çağırır bu Kitab.

31. Ey qövmümüz! Allah yoluna çağıran Peyğəmbərin səsinə səs verin, ona iman gətirin günahlarınızdan keçsin, ağrılı bir əzabdan qorusun sizi Allah».

32. Allah yoluna çağıran Peyğəmbərin səsinə səs verməyən kəs bilsin, aciz qoya bilməz o yer üzündə Allahı. Və Allahdan başqa da bir arxası olmaz onun. Açıq-aşkar bir sapqınlıq içindədir belələri.

33. Məgər bilməzmidirlər, göyləri, yeri yaradan və bunları yaradanda bir çətinlik çəkməyən Allah ölüləri də diriltməyə qadir olar? Bəli, hər şeyə qadirdir O.

34. O gün cəhənnəm odunu göstərərək kafirlərə deyərlər: «Məgər haqq deyilmi bu?» «Bəli, Rəbbimizə and olsun, haqdır bu» deyərlər. «Kafirlik elədiyinizə görə di dadın əzabı» deyər Allah.

35. Səndən öncə göndərilmiş elçilər səbatlı, səbrli idilər. Sən də onlar sayaq səbrli ol, kafirlərin küfrünə döz, tələsmə. Onlara və'd veriləni gördükləri gün elə zənn eləyərlər ki, gündüzün bir saatından artıq olmaz dünyada yaşadıqları. Bu Qur'an Allah kəlamının sizə bir bəyanıdır. Yalnız yolsuzlardır məhvə məhkum olanlar.