Rəhman və Rəhim Allahın adıyla

1. Ha mim.

2. Hər şeyi bəyan eləyən bu Kitaba and olsun,

3. mübarək bir gecədə nazil elədik Qur'anı. Nazil elədik xəbərdarlıq yetirək bununla insanlara.

4. Hikmət dolu hər bir iş açıqlanır o mübarək gecədə.

5. Bu, Bizim dərgahımızdan gələn əmrə görə belədir. Biz əzəldən insanlara elçilər göndəririk

6. Rəbbinin dərgahından bir rəhmət payı olaraq. Hər şeyi eşidən, hər şeyi bilən Odur.

7. Göylərin, yerin, bunların arasında olanların Rəbbidir. Yə'qinliklə inanırsızsa buna, bilin, Muhamməd də Allahın Elçisidir.

8. Allahdan başqa tanrı yoxdur. Dirildən də Odur, öldürən də O. Sizin də Rəbbinizdir, öncə gəlib getmiş olan atalarınızın da.

9. Öləndən sonra diriləcəklərinə şəkk gətirər, bunu əyləncəyə döndərib gülər kafirlər sənə.

10. Gözlə o günü ki, aydın görünən duman gələr göydən.

11. Gələr bürüyər insanları. «Ağrılı bir əzabdır bu gələn.

12. Rəbbimiz! Bizdən uzaq elə bu əzabı. Biz artıq inanırıq Sənin Elçinə» deyərlər.

13. O zaman kimdən öyüd alıb imana gələrlər görəsən? haqqı bəyan eləyən bir elçi gəlmişdi axı onlara.

14. Ondan üz döndərmişdilər. «Öyrədilmiş bir dəlidir» demişdilər.

15. Bir müddət uzaq edərik sizdən əzabı, sonra yenə qayıdarsız küfrünüzə.

16. O gün bir-birindən güclü zərbələr vurarıq, böyük müsibətə uğradarıq onları. İntiqam alarıq onlardan.

17. Onlardan öncə də Fir'onun qövmünü imtahana çəkmişdik. Nəcib bir peyğəmbər gəlmişdi yanlarına, demişdi:

18. «Ey Allahın bəndələri, mənə doğru gəlin. Mən sizə göndərilmiş e'tibarlı bir elçiyəm.

19. Allaha qarşı təkəbbürlü olmayın. Aşkar bir dəlil gətirmişəm sizə.

20. Məni daşa bassanız, Allaha sığınaram. Mənim də, sizin də Rəbbinizdir O.

21. İnanmırsızsa mənə, di məni rahat buraxın».

22. Rəbbinə dua elədi, Ondan yardım dilədi. Bu kafirlər günah yiyələriydilər.

23. Allah buyurdu: «Gecə ikən çıxar yola bəndələrimi. Sizi tə'qib edəcəklər.

24. Dəniz sakitləşdimi, quruya çıx. Qərq olacaq sulara Fir'onun əsgərləri».

25. Tərk elədi Fir'onun adamları neçə-neçə bağları, çayları-bulaqları,

26. əkin sahələrini, gözəl-gözəl məqamları,

27. içində üzdükləri naz-ne'mətləri.

28. Biz də başqa bir qövmü varis elədik bunlara.

29. Onların halına ağlamadı göylə yer. Bir möhlət də verilmədi onlara tövbə edə bilələr.

30. Xilas elədik İsrail oğullarını alçaldıcı əzabdan.

31. Fir'onun əlindən aldıq onları. Həddini aşanların böyüyüydü Fir'on.

32. Aləmlərdən üstün tutduq İsrail oğullarını. Bilirdik nəyə qadirdir onlar.

33. Ayələr bağışladıq onlara. Aşkar ne'mət daşıyırdı ayələrin hər biri.

34. Bu kafirlər deyərlər:

35. «Bir dəfə öldükmü daha dirilən deyilik.

36. Doğru sözlü, düz əməlli kimsələrsinizsə, qaytarın özümüzə bizim atalarımızı».

37. Bunlarmı yaxşıdır, Tubbə qövmümü, yoxsa ki, bunlardan öncəkilər? Biz onların hamısını məhv eləmişik. Günaha batmışdılar.

38. Göyləri, yeri, bunların arasında olanları əylənərək yaratmadıq.

39. Yalnız haqq olaraq yaratmışıq onları. Ancaq bunu bilməz çoxları.

40. Kafirlərlə mö'minlərin hamısının bir-birindən ayrılacağı gündür qiyamət günü.

41. Bir karına gələn deyil dost dostun o gün. Yardım da görməz onlar.

42. Ancaq Allahın rəhmi gəldiyi kimsələr başqa. Güclü, Rəhim təkcə Odur.

43. Şübhəsiz, o zəqqum ağacını

44. o günah yiyəsi yeyəsidir.

45. Metal ərintisi kimi əriyəsidir, qaynayasıdır qarınlarda

46. qaynar su sayaq.

47. «Tutub sürükləyin onu cəhənnəmin ortasına.

48. Sonra qaynar suyun əzabını tökün onun başına».

49. «Di dad əzabı, güclü və nəcib olan söylə, təkcə sənmi idin?

50. Bax bu daddığın əzaba bir vaxt şəkk gətirirdin».

51. Müttəqilər arxayınlıq içindədir,

52. cənnət bağlarındadır, bulaqlar başındadır.

53. Zərif ipəkdən və parlaq atlasdan biçili geyimlərində bir-birilə üzbəüz əyləşiblər.

54. Bu belədir. İri gözlü cənnət hurilərilə onları taylaşdırarıq.

55. Arxayın-arxayın hər cür meyvədən istəyib yeyə bilərlər burada.

56. Dünyada daddıqları o ilk ölümdən sonra bir daha dadmazlar burda ölümü. Qorumuş onları cəhənnəm əzabından

57. Öz lütfüylə Rəbbin sənin. Budur o böyük qurtuluş!

58. Biz Qur'anı sənin doğma dilində göndərdik, dedik bəlkə öyüd alalar [ərəblər].

59. Sən gözlə onların yox olacaq gününü. Onlar da gözləməkdədir sən nə vaxt öləcəksən.