Rəhman və Rəhim Allahın adıyla

1. Göylərdə nə varsa, yerdə nə varsa həmd oxuyar hər şeyin yiyəsi, pak, güclü, müdrik Allaha.

2. Savadsız kimsələrin [dini, Kitabı olmayan bütpərəstlərin] içindən seçib onlara bir Peyğəmbər göndərən Odur. Allahın ayələrini oxuyar onlara, paklığa çağırar onları, Kitabı və Hikməti öyrədər onlara bu Peyğəmbər. Bundan öncə aşkar bir sapqınlıq içində vurnuxurdular.

3. Onlardan sonra gələn və onlara qoşulmamış olanlara da bu Peyğəmbəri göndərən Allahdır. Güclüdür, müdrikdir O.

4. Budur lütfü Allahın. İstədiyi kimsəyə verər onu Allah. Böyük lütf yiyəsidir Allah.

5. Tövrata görə cavab yükü daşıyan və sonra bu yükü daşımaqdan daşınan kimsələr belində kitablar daşıyan eşşək kimidir. Nə pis bir şey imiş Allahın ayələrini dananların bənzəri. Zalımları doğru yola çəkməz Allah.

6. De ki, «Ey yəhudilər! İddia eləyirsiz, insanlar arasında Allaha ən çox yaxın sizsiniz. Doğru sözlü, düz əməlli kimsələrsinizsə, özünüzə ölüm diləyin».

7. Gördükləri işlərin qarşılığında əsla diləməzlər ölümü. Zalımların işləklərini biləndir Allah.

8. De ki, «O ölümdən ki, siz qaçırsız, mütləq haqlayar sizi. Və axır dönərsiniz görülməzi, görüləni bilənin dərgahına. O da bildirər sizə nə iş tuturdunuzsa.

9. Ey iman gətirənlər! Cümə günü namaza çağıran azan oxunan zaman, Allahı anmağa tələsin, alış-veriş işlərini qoyun bir yana. Bunun sizə xeyrini bilsəydiniz.

10. Elə ki, bitirdiniz namazı, dağılışın yer üzünə. Allahın lütfündən pay diləyin. Allahı çox anın ki, bəlkə uğura uğrayasız.

11. Harda bir alış-veriş, yaxud bir əyləncə gördülərsə, xütbə oxuduğun yerdə səni tərk eləyərək oraya axışarlar. De ki, «Əyləncədən də, alış-verişdən də Allahın dərgahındakı daha yaxşıdır. Allahdır ruzi verənlərin ən yaxşısı».