Corc Meyson

N.QASIMOĞLU CORC MEYSON UNİVERSİTETİNDƏ GÖRÜŞ KEÇİRİB

Din və Demokratiya Mərkəzinin (DDM) sədri Nəriman Qasımoğlunun ABŞ görüşləri davam edir. Postsovet müsəlman ölkələrində dini situaiya üzrə mütəxəssis kimi uzunmüddətli ezamiyyətdə olan ilahiyyatçı alim fevralın 5-də Virciniya ştatının Corc Meyson Universitetinin Münaqişələrin Analizi və Həlli İnstitutunun professor-müəllim heyəti ilə görüşü keçirilib. «İslam və dövlət: yeni ideyalar və modellər axtarışında» mövzusunda məruzə edən N.Qasımoğlu islamla dünyəvi dövlət arasında qarşılıqlı münasibtlərin tənzimlənməsi barədə öz fikirlərini açıqlayıb. Görüş barədə «Azadlıq»ın müxbirinin suallarını cavablandıran DDM sədri Qərbin islamın siyasiləşməsindən və dini ekstremist tendensiyaların yayılmasından narahatlıq duyan bəzi siyasi dairələrinin dindarlar arasında sufizmin yayılmasını təklif etdiyini söyləyib. «Bu ideya ötən ilin oktyabrında Səmərqənd konfransında da səslənmişdi. Amma biz bu təkliflə razılaşmırıq. Çünki sufilik elitar bir təzahürdür və heç zaman kütlənin malı olmayıb. Digər tərəfdən, xalqın cari sosial problemlərinə müraciət edən cərəyanlara qarşı dövlət strukturlarının sufizmin yayılmasına rəvac verməsi də inandırıcı deyil. Biz bu görüşdə də hamıya məlum demokratik dəyərlərin, insan azadlıqlarının Quran məntiqi çərçivəsində dini nöqteyi-nəzərdən şərhini vermək, əsl din dəyərlərini demokratikləşmə işinə cəlb etmək barədə fikirlərimizi açıqladıq» – deyə DDM sədri bildirib.