Rəhman və Rəhim Allahın adıyla

1. De ki, «Mənə vəhy edilib, mən Qur'an oxuyan zaman bir dəstə cin qulaq verib dinləmiş, qayıdıb öz qövmünə belə söyləmiş: «Heyrətamiz bir Qur'an dinləmişik.

2. Doğru yola yönəldəndir bu Qur'an, buna iman gətirmişik. Daha heç bir kimsəni Rəbbimizə şərik qoşmarıq.

3. Ucalardan ucadır Rəbbimizin böyüklüyü. Nə bir zövcə, nə bir övlad götürməmiş Özünə.

4. Allahın adına yalanlar yaxardı içimizin ağılsızı.

5. Biz güman eləməzdik insanlarla cinlər Allahın adına yalan yaxa bilələr.

6. İnsanların bə'zisi cinlərin bə'zisinə gerçəkdən sığınardılar və bunların ağılsızlığını daha da artırardılar.

7. Onlar da sizin kimi elə bilərdilər heç kəsi yenidən dirildən deyil Allah.

8. İstədik göyə çıxaq, yanar odla silahlı, güclü keşikçilərlə [mələklərlə] dolu gördük biz göyü.

9. Göyə qulaq vermək üçün [mələklərin söhbətini eşitmək üçün] göyün bə'zi yerlərində yer tutub oturardıq. İndi göyün söhbətini kim dinləmək istəsə ona tuş gələcək bir alovla rastlaşar.

10. Şərmi istənilmiş yer üzündə olanlara, xeyirmi diləmiş Rəbbi onlara, bilmərik.

11. Aramızda yaxşılar da, pislər də var. Ayrı-ayrı yolların yolçularıydıq.

12. İndi anlamışıq, yer üzündə qalsaq da belə, başqa bir məkana qaçsaq da belə, aciz qoya bilmərik biz heç zaman Allahı.

13. Doğru yolu nişan verən Qur'anı dinləmişik, ona iman gətirmişik. Rəbbinə inanan kəs nə savabının azalmağından, nə pisliyinin artmağından qorxuya düşməz.

14. Aramızda özünü Allaha təslim edənlər də, zalım kafirlər də var. Doğru yola yönəlmiş özünü Allaha təslim edən kimsələr.

15. Zalım kafirlərə gəlincə isə cəhənnəmə atılan odunlar olmuş onlar».

16. Doğru yolun yolçusu olsaydılar, bolluca su göndərərdik onlara.

17. Göndərərdik ki, sınağa çəkək onları. Rəbbini anmaqdan boyun qaçıran kəsi artdıqca artan bir əzaba uğradır O.

18. Məscidlər Allahındır, oralarda Allaha dua eləyən zaman duanıza başqasını qatmayın.

19. Allahın bəndəsi [həzrət Peyğəmbər] ayağa qalxdı ki, Ona dua eləyə, az qaldılar bir-birini minələr Qur'anı dinləməkçün.

20. De ki, «Təkcə Rəbbimə dua edirəm, Ona bir kimsəni şərik qoşan deyiləm».

21. De ki, «Mən sizə nə zərər, nə yarar verməyi bacaran deyiləm».

22. De ki, «Allahın qəzəbinə düçar olarsam. Onun əzabını heç kim məndən sova bilməz. Ondan başqa heç kimə sığınan deyiləm.

23. Mənim öhdəmdə olan Allahın dərgahından gələni, Onun göndərdiklərini yalnız bəyan eləməkdir». Cəhənnəm odu gözləyir Allaha və Rəsuluna qarşı çıxan kimsəni. Od içində əbədilik qalar o.

24. Belələri gördümü və'd verilən əzabı, onda biləcəklər kimin yardımçıları daha zəifdir, kimin adamları sayca daha azdır.

25. De ki, «Mən bilmərəm sizə və'd verilən yaxındamı, yaxud Rəbbim uzatmışmı Öz və'dinin və'dəsini».

26. Görülməzi bilən Allah Özünün görülməz aləmilə heç kəsi tanış eləməz.

27. Yalnız Özünün seçdiyi hər peyğəmbərə qeybdən istədiyi bir şeyi bildirər Allah. Önündən, arxasından ona göz qoyan mələkləri göndərər O.

28. Göndərər ki, bilə O, Rəblərinin göndərdiyi kəlamları peyğəmbərlər necə bəyan edirlər. Onların işlərini bilər, hər şeyin hesabını aparar birər-birər.