Rəhman və Rəhim Allahın adıyla

1. Ha mim.

2. Güclü, müdrik olan Allah nazil eləmiş bu Kitabı.

3. Şübhəsiz, göylərdə, yerdə ayələr var iman gətirənlər üçün.

4. Sizin yaradılmağınızda, canlıların yaradılaraq yer üzündə yayılmasında ayələr var yəqinliklə inanmış kimsələr üçün.

5. Gecəylə gündüzün növbələşməsində, ruzi yetirmək üçün Allahın göydən su göndərib ölmüş torpağı diriltməsində, küləkləri istədiyi kimi və istədiyi səmtə əsdirməsində ayələr var anlayan kimsələr üçün.

6. Bunlar Allahın ayələridir. Haqq olaraq oxuyuruq sənə bunları. Allaha, Onun ayələrinə inanmırsa kafirlər, bəs hansı söhbətə inanar onlar?

7. Vay halına hər yalan danışanın, hər günah yiyəsinin.

8. O kəsin ki, Allahın ayələri ona oxunan zaman dinləyər, sonra isə bunları sanki eşitməyibmiş təkəbbürlü-təkəbbürlü üz döndərər imandan, küfründə israr eləyər. Ağrılı bir əzab ilə müjdələ onu.

9. Ayələrimizdən nəyisə öyrəndimi, başlayar o şeyi ələ salmağa. Alçaldıcı bir əzab gözləyir belələrini.

10. Cəhənnəm çıxacaq qabaqlarına. Qazandığı şeylərin də, Allahı qoyub dostlar olaraq tapındıqları bütlərin də bir faydası olmayacaq onlara. Böyük bir əzab gözləyir onları.

11. Doğru yolu göstərəndir bu Qur'an. Ağrılı və iyrənc bir əzab gözləyir Rəblərinin ayələrini dananları.

12. Gəmilər Onun əmrilə üzələr deyə, lütfündən pay olaraq verdiyi ruzini arayasız deyə, Ona şükr eləyəsiz deyə sizə tabe eləmiş dənizi Allah.

13. Göylərdə nə varsa, yerdə nə varsa hər şeyi sizə tabe eləmiş. Şübhəsiz, bunda ayələr var düşünüb-daşınanlar üçün.

14. Mö'minlərə de ki, Allahın cəza günlərindən qorxmayanların günahlarından keçsinlər. Qazandıqları günahlara görə Allah Özü versin cəzalarını.

15. Kim saleh bir iş görürsə, bu onun öz xeyrinə kim pis bir iş görürsə, bu onun öz şərinə. Rəbbinizin dərgahına dönəcəksiz axırı.

16. Kitab verdik, hakimlik verdik, peyğəmbərlik verdik İsrail oğullarına. Təmiz-təmiz şeylərdən ruzilər yetirdik onlara. Aləmlərdən üstün tutduq onları.

17. Aşkar dəlillər verdik onlara din işlərində. Ancaq elm aldıqdan sonra çəkişməyə başladılar, zəhlələri gedirdi bir-birindən onların. Çəkişdiyi şeyləri qiyamət günü ayırd edəcək, Öz hökmünü verəcək Rəbbin onlara.

18. Sonra da biz səni seçdik, din işlərində şəriət sahibi səni elədik. Şəriətə tabe ol, bilgisizlərin həvəsinə, istəyinə uymayasan.

19. Allahın qəzəbini taleyindən azacıq da dəf etməyə çatan deyil gücləri. Şübhəsiz, bir-birinin dostudur zalımlar. Müttəqilərinsə dostu Allahdır.

20. İnsanları deyib aşkar həqiqətlər daşıyan bir Kitabdır bu Qur'an, yol göstərir, rəhmət verir dərindən inanan kəslərə.

21. Yoxsa pisliklər törədən kimsələr elə bilirlər ölüb dirilmək hamıya eyni cür aid olduğundan iman gətirənlərlə, saleh işlər görənlərlə onları bir tutacağıq? Çox səhv fikirdədirlər.

22. Göyləri, yeri haqq olaraq yaratmış Allah. Hər kəs qazandığı günaha görə alar öz cəzasını. Belələrinin haqqında bir haqsızlıq edilməz.

23. İstəyini özünə tanrı seçəni de, tanıdınmı? Yaranmamışdan öncə də tanıyırdı, azdırmış onu Allah. Qulaqlarına, ürəyinə möhür vurmuş, gözlərinə pərdə çəkmiş Allah. Allahdan başqa onu doğru yola kim çəkəcək? Bunu anlamazmısınız?

24. «Həyatımız yalnız bu dünyadadır, ölürük burada, yaşayırıq burada. Yalnız zaman bizi yoxa çıxarar» deyərlər. Yox onların bu barədə heç bir bilgisi. Sadəcə olaraq belə zənn eləyərlər.

25. Ayələrimiz açıqlanaraq onlara oxunan zaman bunların əleyhinə bir dəlil gətirmədən «Doğru sözlü, düz əməlli kimsələrsinizsə, di qaytarın özümüzə bizim atalarımızı» deyər sadəcə onlar.

26. De ki, «Sizə öncə can verər, sonra sizdən can alar, sonra da qiyamət günü cəm eləyər bir yerə sizi Allah. Şübhə yoxdur gəlməyinə o günün. Ancaq ki, çoxları bilməz bunu».

27. Allahdır göylərin, yerin yiyəsi. Qiyamət qopacaq gün, məhz həmin gün itkiyə uğrayar batilpərəst kimsələr.

28. Diz çökmüş görərsən sən o gün hər ümməti. Özünün əməl kitabına doğru gəlməyə çağırarlar hər ümməti. «Bu gün, gördüyünüz işlərə əvəz olaraq alacaqsız cəzanızı.

29. Haqq olaraq danışar bu yazımız sizin əleyhinizə. Gördüyünüz işləri birər-birər burda qeydə alırdıq».

30. O kəslər ki, iman gətiriblər, saleh işlər görüblər, onları rəhmətinin yazısına salar Rəbləri. Budur aşkar qurtuluş!

31. Kafirlərə gəlincə isə, «Ayələrim sizə oxunmadımı? Təkəbbürlük elədiniz, günahlara batdınız» deyilər onlara.

32. «Allahın və'di haqdır, qiyamət saatının gəlməyinə şübhə yoxdur» deyiləndə onlara, «Nə bilək qiyamət saatı nədir? Yalnız zənn edə bilərik bunu, bu barədə aydın anlamımız yox» deyərdilər.

33. Aydın olmuş onlara gördükləri pis işlər, yaxalamış onları lağa qoyduqları şeylər.

34. O gün onlara deyilər: «Bu günə qovuşacağınızı unutmuşdunuz. Biz də unuduruq sizi bu gün beləcə. Bu gün od olar yuvanız. Bir kimsə də tapılmaz yardım göstərə sizə.

35. Çünki lağa qoymuşdunuz Allahın ayələrini, çünki aldatmışdı sizi dünya həyatı». O gün çıxarmazlar onları od içindən. Onlardan heç tələb də olunmaz üzr diləyələr, tövbə eləyələr.

36. Təkcə Allahı həmd eləməli. Göylərin Rəbbidir, yerin Rəbbidir, aləmlərin Rəbbidir O.

37. Göylərdəki, yerdəki əzəmət Onundur. Güclü, müdrik təkcə Odur.