ABŞ-da səfərdə olan Din və Demokratiya Mərkəzinin sədri Nəriman Qasımoğlu «Azadlıq» radiosunun Azərbaycandakı siyasi durumla bağlı keçirdiyi tədbirdə iştirak edib. Görüşdə çıxış edən İrina Lesota və N.Qasımoğlu ölkədəki siyasi situasiya ilə bağlı fikirlərini açıqlayıb, sualları cavablandırıblar. DDM sədri Qərb, o cümlədən ABŞ-ın Azərbaycanda böyük simpatiya kapitalına malik olduğunu vurğulayıb. N.Qasımoğluya görə, bu krediti qorumaq üçün Qərb istər Azərbaycanda, istərsə də postsovet müsəlman ölkələrdə mülki cəmiyyət quruculuğuna diqqəti artırmalıdır.

N.Qasımoğluya görə, dövlətin nüfuzunun zəif olması, dövlət institutlarına və siyasi rəhbərliyə inamın aşağı olması fundamentalist qrupların müəyyən əlavə təsadüfi hadisələr şəraitində öz bazalarını genişləndirmək üçün istifadə etdiyi zəif nöqtələrdir. Korrupsiya, rüşvətxorluq, sosial gərginlik, yəni əhalinin aşağı və orta təbəqələrinin iqtisadi və sosial inamsızlıq hiss etməsi fundamentalist əhval-ruhiyyə üçün müsaid şərait yaradır. «Belə şəraitdə fundamentalizm xilaskar ideologiya kimi çıxış edir. O, yaxşı həyat perspektivi vəd edir, şirnikdirici vədlər verir. Çıxış yolu isə demokratikləşmənin, mülki cəmiyyət quruculuğunun sürətləndirilməsindədir. Azərbaycanda demokratiya boğularsa, siyasi islam əl-qol açacaq» deyə N.Qasımoğlu bildirib.