Rəhman və Rəhim Allahın adıyla

1. Əlif ləm mim.

2. Allahdan başqa tanrı yoxdur. O diridir, əbədidir, yaratdıqlarını qoruyandır.

3. Öncəki Kitabları təsdiq üçün haqq Kitabı O göndərmiş sənə. Tövratı, İncili göndərmişdi O

4. bundan öncə göstərməkçin doğru yolu. Doğru nədir, əyri nədir - ayırd edən Kitabı göndərmiş O. Ağrılı bir əzab gözləyir Allahın ayələrini dananları. Güclüdür, intiqam alandır Allah.

5. Yerdə-göydə nə varsa heç bir şey Allahdan gizli qalmaz. Odur ana bətnində sizi istədiyi şəklə salan.

6. Ondan başqa tanrı yoxdur. Güclüdür, müdrikdir O.

7. Kitabı O göndərmiş sənə. Aydın anlamlıdır burda bə'zi ayələr. Kitabın anasıdır bu ayələr. Digərləri oxşar anlamlar daşıyır. Oxşar ayələrdən yapışar ürəyi düz olmayanlar fitnə-fəsad törətmək üçün, özlərinin xeyrinə yozar onlar bu ayələri. Allahdan başqa kimsə bilməz bunların yozumunu. "Ona iman gətirdik, Rəbbimizdən gəlir hər şey" deyər dərin alimlər. Yalnız ağıllı adamlar bunu düşünüb anlar.

8. Rəbbimiz, doğru yola yönəltdikdən sonra bizi qırma ürəyimizi, rəhmətindən pay ver bizə. Sonsuzdur səxavətin.

9. Rəbbimiz, gəlməyi haqq olan o gün cəm edərsən insanları bir yerə. Sözündən dönməz Allah.

10. Kafirlər ki var, nə malları, nə uşaqları qurtarar onları Allahın buyruğundan. Odda yanacaq onlar

11. Fir'on ailəsi və ondan öncəkilər kimi. Ayələrimizi danmışdılar. Günahlarına görə yaxaladı onları Allah. Allahın cəzası şiddətlidir.

12. "Məğlub olacaqsız, cəhənnəmə dolacaqsız. Pisdən pis yataqdır ora" söylə küfr edənlərə.

13. Üz-üzə gələn bu iki dəstənin döyüşü bir ibrət dərsi idi sizin üçün. Allah yolunda döyüşürdü biri, kafirlərdən ibarətdi o biri. Bunların da gözləri iki görürdü əks tərəfin hər birini. İstədiyinə yardım edər Allah. İbrət götürər bundan bəsirəti olanlar.

14. Qadınlara, uşaqlara, kantar-kantar qızıl-gümüşə, ürgəyə, mal-qaraya, torpağın məhsullarına qarşı hərisliyə, həvəsə qurşanmaq cazibəli göründü insanlara. Bunlar dünya həyatının gəldi-gedər ne'mətləridir. Allahın dərgahıdır gediləsi gözəl yer.

15. De ki, "Söyləyimmi bunlardan yaxşısını?" Allahdan qorxanları Rəblərinin dərgahında içindən çaylar axan cənnətlər gözləyir, oralarda əbədilik qalarlar pak olan zövcələrlə. Allahın rizası oralarda qərar tutub. Allah görür bəndələri -

16. "Rəbbimiz, Sənə iman gətirdik, keç bizim suçumuzdan, qoru bizi oddan yanmaq əzabından" deyən bəndələri,

17. səbr edənləri, sadiqləri, hüzurunda ürəkdən əyilənləri, Allah yolunda xərcləyənləri, səhərlər bağışlanmalarını diləyənləri.

18. Allah şahidlik etmiş, Ondan başqa tanrı yoxdur. Mələklər və insaflı elm sahibləri şahidlik etmişlər, Ondan başqa tanrı yoxdur. Güclüdür, müdrikdir O.

19. Allah mərtəbəsində din, şübhəsiz, İslam dinidir. Ancaq Kitab verilənləri bilik alandan sonra aralarındakı qısqanclıq ayırmış bir-birindən. Allahın ayələrini danan kimsə bilsin, hesabı tez aparandır Allah.

20. "Mən də, ardıcıllarım da Allaha təslim etdik özümüzü" de səninlə höcətləşənə. "Siz müsəlman oldunuzmu" de Kitab verilənlərə və savadsızlara. Doğru yolu taparlar müsəlman olsalar. Dindən üz döndərsələr sənin borcun yalnız başa salmaqdır onları. Bəndələri görür Allah.

21. Allahın ayələrini dananları, haqsız yerə peyğəmbərləri öldürənləri, ədalətin keşiyində duranları öldürənləri ağrılı bir əzab ilə xəbərlə!

22. Dünyada və axirətdə boşa çıxar işləri. Bir kimsə də yardım etməz onlara.

23. Kitabdan pay düşənləri görmədinmi? Hökm almaq üçün Allahın Kitabına üz tutar onlar, sonra da bə'zisi üz döndərər ondan.

24. "Yalnız sayılı günlərdə toxunacaq od bizə" demişdi belələri. Və uydurmalarına görə yanılmışlar dinlərində.

25. Bəs gəlməyi haqq olan gündə onları cəm etsək necə, hər kəsin qazandığını haqsızlığa yol vermədən özünə qaytarsaq necə, onda necə olar halları?

26. De ki, "İlahi, ey varlığın yiyəsi, Sən dilədiyinə verirsən mal-dövləti, dilədiyinin əlindən alırsan mal-dövləti, istədiyini ucaldırsan, istədiyini alçaldırsan. Xeyirxahlıq əlindədir. Sən hər şeyə qadirsən.

27. Gecəni gündüzə, gündüzü gecəyə qatırsan, ölüyə can verirsən, diridən can alırsan, istədiyini hesabsız ruzuya çatdırırsan".

28. Mö'minlər mö'minləri qoyub kafirlərlə dost olmasınlar. Yoxsa Allah dərgahında dəyərsiz olar onlar. Onlardan uzaq olun. Allah sizi Özü ilə qorxuzur. Onun dərgahına axır dönəcək hamı.

29. De ki, "İçinizi, çölünüzü bilir Allah. Göylərdə nə varsa, yerdə nə varsa bilir Allah. Hər şeyə qadirdir Allah".

30. Hər kəsin qabağına çıxar elədiyi pislik - pis əməldən nə qədər uzaq düşmək istəsə də. Qabağı düşünün. Allah Özü ilə qorxuzur sizi. Bəndələrinə şəfqətlidir Allah.

31. De ki, "Allahı sevirsəniz Mənə inanın, Allah da sizi sevsin və keçsin suçunuzdan. Günahlardan keçəndir, Rəhimdir Allah".

32. De ki, "Allaha və Rəsula itaət edin!" Dediyindən üz döndərsələr bilsinlər, kafirləri sevməz Allah.

33. Adəmi, Nuhu, İbrahim ailəsini və İmran ailəsini aləmlərdən üstün tutdu Allah.

34. Bunlar bir nəsildir törəyib bir-birindən. Allah eşidəndir hər şeyi, biləndir hər işi.

35. "Rəbbim, nəzir demişdim Sənə bətnimdən azad olanı, onu məndən qəbul buyur. Tək Sənsən eşidən hər şeyi, bilən hər işi" demişdi İmranın zövcəsi.

36. Doğub qurtarandan sonra - kimi doğduğunu bilirdi Allah - dedi: "Qız doğdum, qızdan fərqlidir oğlan. Adına Məryəm dedim. Onu da, soyunu da məl'un şeytanın şərindən Sən Özün qoru, Rəbbim".

37. Çox yaxşı qəbul etdi Rəbbi onu. Gözəl bir bitki kimi yetişdirdi, Zəkəriyyənin himayəsinə buraxdı onu. Mə'bəddə olduğu zaman hər dəfə girəndə onun yanına yeməyə bir ruzi tapardı Zəkəriyyə, "hardandı bu səndə, Məryəm?" deyərdi. "Allah yetirib" deyərdi Məryəm. İstədiyinə hesabsız ruzi yetirir Allah.

38. Zəkəriyyə orada Rəbbinə dua etdi: "Rəbbim, təmiz bir soy bəxş et mənə, Sən dua eşidənsən".

39. Mə'bəddə dayanıb namaz qılırdı, mələklər səslədilər onu və dedilər: Yəhyənin gəlməsini mücdələyir sənə Allah. Allahdan gələn kəlməni təsdiq edər, ağa olar, nəfsinə hakim kəsilər, yaxşı bir peyğəmbər olar o".

40. "Rəbbim, qocalıq haqlayıb məni, qadınım da sonsuzdur, oğlum necə ola bilər?" dedi. "Elədir, amma Allah dilədiyini edər" dedi Allah.

41. "Rəbbim, elə isə buna dair bir əlamət göstər mənə" dedi. "İnsanlarla üç gün yalnız işarəylə danış, tez-tez yada sal Rəbbini, axşam-səhər həmd et Onu - bu da sənin əlamətin" dedi Allah.

42. "Ey Məryəm, Allah səni seçdi, pak elədi və aləmlərin qadınlarından səni üstün tutdu" demişdi mələklər.

43. "Ey Məryəm, könüldən boyun əy Rəbbinə, səcdə et Ona, ruku edənlərlə birgə əyil önündə demişdi" onlar.

44. Bunlar sənə vəhy etdiyimiz qeyb aləmindən xəbərlərdir. Məryəmə kim qəyyum olacaq deyə qələmlərini atarkən sən onların yanında deyildin, çəkişdikləri zaman da yanlarında deyildin.

45. "Ey Məryəm, Allah səni bir kəlməsilə mücdələyir. Məryəm oğlu İsa olan Məsihdir həmin kəlmə. Dünyada və axirətdə onun sanbalı var. Allaha yaxınlardan sanılar" demişdi mələklər.

46. "Beşik yaşında da, böyüyəndə də insanlarla danışar o, əməli salehlərdən olar o" demişdilər.

47. "Rəbbim, bir bəşər övladı toxunmamış mənə, uşağım necə ola bilər". "Dilədiyini beləcə yaradır Allah, bir şeyə "Ol" desə olasıdır".

48. Kitabı, hikməti, Tövratı və İncili öyrədər ona Allah.

49. İsrail övladlarının peyğəmbəri edər onu və o da belə söyləyər: "Mən sizə Rəbbinizdən bir əlamət gətirdim. Palçıqdan quş şəklində bir şey düzəldərəm sizə, üfürərəm onu, Allahın izniylə o quş canlanar. Açaram korların gözlərini, sağaldaram cüzamlıları. Allahın izniylə dirildərəm ölüləri. Nə yeyəcək, nə saxlayacaqsınız evinizdə xəbər verərəm sizə. Əgər mö'minsinizsə, əlbəttə inanarsınız bu əlamətə.

50. Məndən öncə göndərilən Tövratdakıları təsdiq üçün sizə haram qılınan bə'zi şeyləri halal eləyim deyə gətirdim Rəbbinizdən sizin üçün bir əlamət, bir ayə. Qorxun Allahdan və itaət eləyin mənə.

51. Allah mənim də Rəbbim, sizin də Rəbbinizdir. Onun qulluğunda durun, doğru olan yol budur".

52. Onların kafirliyini duyub "Allah yolunda kimlər mənə yardım edər" dedi İsa. "Biz Allahın yardımçılarıyıq. Allaha iman gətirdik. Ona təslim olduğumuza şahidlik elə" dedi həvarilər.

53. "Rəbbimiz, Sənin göndərdiyinə iman götirdik, Rəsulun ardınca getdik. Şahidlərlə bir yazıya al bizi".

54. Hiyləyə əl atdılar. Allah da hiyləsilə başını qatdı onların. Allah ən yaxşı hiyləgərdir.

55. "Ey İsa, səni əcəlinə çatdıraram, Öz yanıma ucaldaram. Kafirlərdən təmizləyib səni pak edərəm, ardıcıllarını qiyamətə qədər kafirlərdən üstün tutaram. Sonra Mənim dərgahıma qayıdarsınız. Mübahisələrinizi həll eləyib hökm verərəm" demişdi Allah.

56. "Kafirlərə də şiddətli bir cəza verərəm dünyada və axirətdə, yardımsız qalar onlar".

57. İman gətirənlərin və əməli salehlərin verər əcrini. Zalımları sevməz Allah.

58. Ayələrdən, hikmət dolu Qur'andan oxuyuruq bunları sənə.

59. Allah dərgahında İsanın vəziyyəti Adəminki kimidir. Torpaqdan yaratdı Adəmi Allah. Sonra "Ol" dedi ona, torpaqdan var oldu o.

60. Rəbbindən gələn haqdır. Buna şübhən olmasın.

61. Sənə göndərilən bilikdən sonra höcətləşmək istəsələr səninlə belə söylə onlara: "Gəlin çağırıb toplayaq bir yerə oğullarımızı, oğullarınızı, qadınlarımızı, qadınlarınızı - bizləri və sizləri. Və sonra bir ağızdan yalvaraq ki, Allah lə'nətləsin yalançıları.

62. Gerçək əhvalatdır bu deyilənlər. Allahdan başqa tanrı yoxdur. Şübhəsiz, güclüdür, müdrikdir Allah.

63. Əgər üz çevirsələr, bilsinlər, pozğunçuluq edənlərin əməllərini, şübhəsiz, bilir Allah.

64. "Ey Kitab əhli, gəlin sözü bir yerə qoyaq, Allahdan başqasına ibadətdə olmayaq, Ona şərik qoşmayaq, Allahı qoyub bir-birimizin arasında Rəbbləri axtarmayaq" söylə onlara. Əgər üz çevirsələr, "Şahid olun, biz müsəlman olmuşuq" deyin onlara.

65. Ey Kitab əhli, İbrahim haqqında niyə höcətləşirsiz? Axı Tövrat da, İncil də ondan sonra nazil olub. Düşünməzmi oldunuz bunu.

66. Deyək ki, siz az bildiyiniz şey haqqında höcətləşdiniz. Bəs niyə höcətləşirsiz az da olsa bilmədiyiniz şey haqqında? Hər şeyi Allah bilər, siz bilməzsiniz.

67. Nə yəhudi, nə də xristiandı İbrahim, əsil müsəlmandı İbrahim, müşriklərdən deyildi.

68. Doğrusu, İbrahimə ən yaxın insanlar - onun ardıcılları, bu Peyğəmbər Muhamməd və iman gətirənlərdir. Allah da mö'minlərin dostudur.

69. Kitab əhlinin bir qismi istərdi sizi azdıra yolunuzdan. Özləri də duymadan azdırırlar özlərini.

70. Ey Kitab əhli! Həqiqəti görə-görə niyə danırsınız Allahın ayələrini?

71. Ey Kitab əhli! Haqqa nahaq don geydirib nəyə görə bilərəkdən haqqı gizlədirsiniz?

72. Kitab əhlinin bir dəstəsi belə dedi: "Günün başında mö'minlərə göndərilənə iman gətirin, günün sonunda onu danın, bəlkə onlar dönələr öz dinindən.

73. Heç kimə inanmayın sizin dinə iman gətirənlərdən savayı". "Doğru yol Allah yoludur" de onlara. "Sizə verilən bir başqasına da verilir deyəmi, yaxud Rəbbinizin dərgahında əleyhinizə dəlillər gətirirlər deyəmi belə fikrə düşdünüz?" deyərlər. Sən də de ki, "Allahın əlindədir fəzilət, istədiyinə verir O fəzilətini". Hər yeri tutmuş Allah, hər şeyi bilir Allah.

74. Rəhmətini istədiyinə ayırıb verər Allah, lütfü böyükdür Allahın.

75. Kitab əhli arasında eləsi var bir kantar əmanət versən ona qaytarar əmanəti. Eləsi də var bir dinar əmanət versən ona kəsdirməsən üstünü qaytarmaz əmanəti. Səbəbi də odur ki, "Savadsızlara görə biz cavabdeh deyilik" deyərlər və bilə-bilə yalan söyləyərlər Allaha qarşı.

76. Bəli, əhdinə vəfa eləyən, günahdan taqva eləyən bilsin, müttəqiləri sevər Allah.

77. Allaha verdiyi və'di və andları dəyər-dəyməzinə satanların payı olmaz axirətdə. Qiyamət günü danışmaz onlarla, üzünə baxmaz onların, pisliklərdən təmizləməz onları Allah. Ağrılı bir əzab gözləyir onları.

78. Kitabda olmayan sözü Kitabdan sanasız deyə Kitabdakına bənzədərək, dillərini əyib-büküb tələffüz edər onlardan bir dəstə adam. Allahdan gəlməyibsə də "Allahın sözüdür" deyər və bilə-bilə Allahın adına yalan söyləyər onlar.

79. Kitab, hökm və peyğəmbərlik verəndən sonra Allah ona "Allaha yox, mənə qul olun" demək yaraşmaz insan oğluna. "Kitabı öyrətdiyinizə və öyrəndiyinizə görə Rəbbinizə qul olmalı" demək yaraşar ona.

80. Və mələklərə, peyğəmbərlərə tanrılara olduğu sayaq tapınmağı əmr etməsi də yaraşmaz ona. Siz müsəlman olduqdan sonra küfrümü buyuracaq sizə?

81. Peyğəmbərlərlə şərt kəsmişdi Allah. "Sizə Kitab və Hikmət verdim. Bunları təsdiq üçün sizə bir Rəsul göndərdim. Ona mütləq inanacaq, mütləq yardım edəcəksiz. Qərar verdinizmi buna, götürdünüzmü bu yükümü üstünüzə?" demişdi O. "Bəli, qərar verdik buna" dedilər. "Elə isə şahid olun, Mən də sizinlə birgə şahid olanlardanam" dedi O.

82. Bundan sonra sözündən dönən günaha batar artıq.

83. Allahın dinindən başqa bir dininmi arzusundadır onlar? Göylərdə kim varsa, yerdə kim varsa artıq Ona təslim olmuş könüllü ya könülsüz. Onun dərgahına axır dönəcək hamı.

84. Biz iman gətirdik Allaha, bizə nazil olana, İbrahimə, İsməilə, İshaqa, Yaquba və onların törəmələrinə göndərilənə, Rəbləri tərəfindən Musaya, İsaya və peyğəmbərlərə vörilənə. Bir-birindən ayırmarıq onları. Biz Ona təslim olarıq.

85. İslamdan özgə dinə üz tutanın qəbul olunmaz dini və itirər o axirətdən düşən payı.

86. Allah necə yol göstərsin bir qövmə ki, iman gətirəndən, Rəsulun haqq olduğunu görəndən, onlara aydın ayələr gələndən sonra da küfr etdilər? Zalım qövmü doğru yola çəkməz Allah.

87. Onların üstündədir Allahın, mələklərin və bütün insanların lə'nət yazısı. Budur onların cəzası.

88. Əbədilik qalarlar lə'nət içində, yumşaldılmaz əzabları, heç kim baxmaz üzlərinə.

89. Ancaq sonra tövbə edib düzələnlərə bu aid deyil. Günahlardan keçəndir, Rəhimdir Allah.

90. O kəslər ki, iman gətirəndən sonra küfr etdilər və get-gedə artırdılar küfrlərini - qəbul olunmaz tövbəsi onların. Məhz onlardır doğru yolu azanlar.

91. Kafirlik edənlərin və kafirliyində qalıb ölənlərin heç birinin qəbul edilməz fidyəsi dünyanı dolduracaq qızıl qədər olsa belə. Ağrılı bir əzab gözləyir onları, yardımsız qalar onlar.

92. Sevdiyiniz şeylərdən Allah yolunda sərf etməsəniz almazsınız yaxşılığın qarşılığını. Hər nəyi xərcləsəniz, şübhəsiz, bilir Allah.

93. Bütün yeməklər halal idi İsrail oğullarına, İsrailin [Yaqub peyğəmbərin] özünə haram saydığından savayı. Tövrat nazil olmamışdı o vaxt hələ. "Doğru sözlü, düz əməlli kimsələrsinizsə əgər, gətirin Tövratı, oxuyun onu" söylə.

94. O kəslər ki, bundan sonra da Allahın adına yalan yaxırlar, bilin, zalımların özüdür onlar.

95. De ki, "Doğru söyləmiş Allah. Doğru yola yönələn İbrahimin dininin ardınca gedin, müşriklərdən deyildi o".

96. Həqiqətən, insanlar üçün qurulan ilk ev Məkkədədir, aləmlərə mübarək və doğru yol göstərən Kə'bədir.

97. Aydın-aydın dəlillər var orada. İbrahimin məqamı var orada. Oraya girən əmin-amanlıq içində olur. Oraya yol getmək imkanında olan kimsələr Kə'bəni həcc etməli. Kafirlik eləyən bilsin, hamıdan varlıdır, aləmlərdən ucadadır Allah.

98. De ki, "Ey Kitab əhli, Allahın ayələrini siz niyə danırsınız? İşləklərinizi görür Allah".

99. De ki, "Ey Kitab əhli, nəyə görə haqqı görüb bilə-bilə Allahın yolunu əyri göstərirsiniz, mö'minləri azdırırsınız Allah yolundan? İşləklərinizdən qafil deyil Allah".

100. Ey iman gətirənlər! Kitab verilənlərin bir qisminə itaətdə olsanız dininizdən döndərib kafir edərlər sizi

101. Allahın ayələri oxuna-oxuna sizə, Rəsulu ola-ola aranızda siz necə küfr edərsiniz? Allahın Kitabına kim sarılarsa, doğru yola çıxar o.

102. Ey iman gətirənlər! Gerçəkdən qorxun Allahdan və ancaq müsəlman olaraq can verin.

103. Allahın ipindən yapışın hamılıqla, ayrılmayın ondan. Anın Allahın sizə verdiyi bol ne'məti. Düşməndiniz bir zaman, qəlblərinizi birləşdirdi O. Onun ne'mətilə qardaş oldunuz. Odlu bir uçurumun kənarında idiniz, sizi xilas etdi Allah. Düz yola gələsiz deyə beləcə açıqlayır ayələri Allah.

104. Qoy sizin içinizdən yaxşılığa çağıran, düzgünlüyü buyuran, adamları fənalıqdan qoruyan bir icma yaransın. Uğura uğrayar onlar.

105. Oxşamayın o kəslərə ki, aydın dəlilləri görəndən sonra fikir ayrılığına düşüb cidala başladılar. Böyük bir əzab gözləyir onları qiyamət günü.

106. O gün ağarar bə'zi üzlər, qaralar bə'zi üzlər. Yzüqara olanlara "İman götirəndən sonra kafirlikmi etdiniz? Elə isə dadın əzabı" deyiləcəkdir.

107. Yzüağ olanlarsa isə Allahın rəhmətində əbədilik qalarlar.

108. Bunlar Allahın ayələridir. Bunları sənə haqq olaraq oxuyuruq. Aləmlərə [heç kimə] zülm eləmək istəməz Allah.

109. Allahındır göylərdə nə varsa, yerdə nə varsa. Allaha qalar bütün işlər.

110. Siz insanlar üçün yaradılan ən gözəl ümmətdiniz. Düzgünlüyü buyurardınız, adamları fənalıqdan qoruyardınız, Allaha inanardınız. Kitab əhli imana gəlsəydi özləri üçün daha yaxşı olardı. İmana gələnlər var onların arasında, amma çoxu yolundan sapmışlardır.

111. İncitməkdən başqa bir zərər verməzlər sizə. Sizinlə savaşa girsələr geri dönüb qaçarlar. Sonra yardım da edilməz onlara.

112. Harada olurlar olsunlar - Allahın və mö'minlərin himayəsindən savayı - əzilməyə məhkumdurlar. Allahın qəzəbinə düşüblər, düşgünlük damğası vurulub onlara. Allahın ayələrini danırdılar, peyğəmbərləri haqsız yerə öldürürdülər. Allaha qarşı üsyana qalxmışdılar, düşmənçilik edirdilər.

113. Kitab əhlinin hamısı bir deyil. Onlardan eləsi var gecələr Allaha səcdə qıla-qıla Allahın ayələrini oxuyar.

114. Allaha və axirət gününə inanar, pis əmələ yaxın durmaz, xeyirxahlıq eləməyə tələsər onlar. Əməli salehlərdəndir onlar.

115. Nə yaxşı iş tutarlarsa çıxar qarşılarına. Müttəqiləri tanıyır Allah.

116. Allah dərgahında nə malları, nə də uşaqları azad edər kafirləri günahlarından. Cəhənnəmlikdir onlar, od içində əbədilik qalarlar.

117. Şaxtalı küləyə bənzəri var bu dünyada onların xərclədiyi şeylərin. Dondurub məhv edər bu külək özünə zülm eləyən qövmün əkin yerini. Onlara zülm eləyən Allah deyil, özləri özlərinə eləyirlər.

118. Ey iman gətirənlər, sizdən olmayanı özünüzə sirdaş eləməyin. Sizi çaşdırmaqdan çəkinməzlər, istərlər çətinə düşəsiz. Qəzəb daşıb tökülər ağızlarından. Sinələri daha çox doludur kin-küdurətlə. Aydınlatdıq ayələri sizlərə ağlınıza girdisə.

119. Baxın, sizi sevməsələr də sevirsiniz onları, inanırsınız Kitaba başdan ayağa. Sizinlə üzləşəndə "İmana gəldik" deyərlər, yalqızlıqda qalanda qəzəbdən dişləyərlər barmaqlarını. "Qəzəbdən çatlayın, ölün" söylə onlara. Sinələrin altını, şübhəsiz, bilir Allah.

120. Pisinə gedər onların sizə bir yaxşılıq dəysə. Sevincək olarlar sizə bir pislik dəysə. Dəyməz sizə bir zərəri onların hiyləsinin səbrli olsanız, Allahdan qorxsanız. Onların işləklərinin qarşısını alar Allah.

121. Sən evindən-eşiyindən erkən ayrılmışdın ki, mö'minləri döyüş üçün cərgələrə düzəsən. Hər şeyi eşidəndir, hər işi biləndir Allah.

122. Sizdən iki dəstə geri çəkilmək istəmiş. Halbuki onların dostu idi Allah. İman gətirənlər güvənsinlər Allaha.

123. Allah yardım etmişdi sizə Bədirdə. O zaman zəifdiniz. Allahdan qorxun ki, şükr eləyə biləsiz Ona.

124. O zaman sən mö'minlərə deyirdin: "Rəbbinizin üç min mələklə yardımı bəs etməzmi sizə?

125. Bəli, səbriniz tükənməsə, Allahdan çəkinsəniz və onlar da dayanmadan üstünüzə gəlsələr beş min nişanlanmış mələklə Rəbbiniz yetişər imdadınıza.

126. Yrəyiniz arxayın olsun deyə yardımını sadəcə mücdələyir sizə Allah. Yardım yalnız güclü və müdrik olan Allahdan gələr.

127. Kəsər kafirlərin qol-qıçını, yaxud darmadağın edər onları O. Ymidsiz-ümidsiz dönüb qaçarlar geriyə.

128. Tövbələrini qəbul edər, ya onlara əzab verər - sənə dəxli yox bunun. Hər nə isə zalımlardır onlar.

129. Allahındır göylərdə nə varsa, yerdə nə varsa. İstədiyi kimsənin keçər suçundan, istədiyinə əzab verər. Bağışlayandır, Rəhimdir Allah.

130. Ey iman gətirənlər! Verdiyinizdən faiz alıb yeməyin. Allahdan qorxun ki, uğura uğrayasız,

131. Kafirlər üçün hazırlanmış oddan çəkinin.

132. Allaha və Rəsula itaət eləyin bəlkə bağışlana günahlarınız.

133. Tələsin Rəbbinizin məğfirətinə, göylər və yer qədər geniş olan və müttəqilər üçün hazırlanmış cənnətə.

134. Xərcləyər malını xeyirdə-şərdə, udar qəzəbini, əfv edər insanları onlar. Allah da sevər yaxşılıq edənləri.

135. Bir fəna iş tutanlar, özlərini incidənlər Allahı yada salar, günahlarının bağışlanmasını dilərlər. Allahdan başqa kim bağışlaya bilər onları. Tutduqları əməllərdə bilə-bilə israr eləməz onlar.

136. Əvəzində onlara Rəbləri məğfirət verər və içindən çaylar axan cənnətləri qismət eləyər ki, oralarda əbədilik qalarlar. Yaxşı davrananların nə gözəl əcri vardır.

137. Nələr gəldi, nələr getdi sizdən öncə. Gəzin-dolaşın yer üzünü, baxın-görün necə olur aqibəti ayələri dananların.

138. İnsanlığın bəyannaməsidir bu Kitab, yol göstərir, öyüd verir müttəqilərə.

139. Əl-qolunuz boşalmasın, qəmlənməyin, əgər mö'minsinizsə hamıdan üstünsünüz.

140. Bir yara aldınızsa, demək nə zamansa o qövm də almışdı buna bənzər bir yara. İman gətirənləri tanısın, aranızdan şəhidlər seçsin deyə paylaşdırırıq bu günləri insanlar arasında [gah bir qövmü, gah o birini qələbəyə çatdırdıq]. Zalımları sevməz Allah.

141. Və inam gətirənləri günahlardan təmizləsin və kafirləri məhv etsin deyə O, beləcə günləri ötüşdürürük.

142. Yoxsa elə bildiniz Allah cihad edənləri və səbirli olanları tanımadan cənnətə girəcəksiniz?

143. Ölümlə üzləşməzdən öncə onu arzulayırdınız. Gözünüzlə gördünüz ölümü. Baxa-baxa qalmışdınız.

144. Ancaq bir Rəsuldur Muhamməd. Ondan öncə də gəldi, getdi elçilər. Geriyəmi dönəcəksiz ölsə ya öldürülsə. Geriyə dönəcək kimsə bir zərər verə bilməz Allaha. Şükr eləyənlərin əcrini verər Allah.

145. Allahdan izinsiz bir kimsə ölə bilməz. Ölüm bir yazıdır əcəli var. Dünyanın da, axirətin də ne'mətindən istəyənə pay veririk. Verəcəyik şükr eləyənlərin əcrini.

146. Neçə-neçə peyğəmbərlərlə bir sırada döyüşmüş bəndələr Allah yolunda. Başlarına gələnlərdən sarsılıb həsləmədilər, zəiflik göstərib süstləşmədilər, itaət göstərmədilər. Səbrliləri sevər Allah.

147. Ancaq bundan ibarətdi söylədikləri: "Rəbbimiz, suçumuzdan keç bizim, işimizdə həddimizi aşmağımıza görə bağışla bizi, addımlarımızı möhkəmlət, kafirlərə qarşı yardım et bizə".

148. Dünyanın və axirətin ne'mətinin yaxşısını onlara vermiş Allah. Gözəl davrananları sevər Allah.

149. Ey iman gətirənlər! Kafirlərə itaətdə olsanız geriyə döndərərlər sizi, itgiyə uğrayarsız.

150. Mövlanız Allahdır. Odur sizin ən yaxşı yardımçınız.

151. Qorxu salacağıq kafirlərin qəlblərinə, hakimliyi haqqında heç bir ayə-dəlil gətirməyə-gətirməyə nəyisə Allaha şərik qoşar onlar. Oda sığınar onlar. Nə pis yerdir zalımların yuvası.

152. Verdiyi sözünün üstündə durdu Allah. Onun izniylə qırıb-tökürdünüz onları. Amma istədiyiniz qələbəni sizə göstərəndən sonra Allah həslədiniz. İrəli getmək, geri durmaq barədə çəkişməyə başladınız. Ona qarşı çıxdınız - kiminiz dünyanı arzulayırdı, kiminiz axirəti. Sonra sizi sınağa çəkmək istədi, onlardan aralayıb geri çəkdi O. Bağışladı sizi O. Mö'minlərə Öz lütfünü göstərər Allah.

153. Kimsəyə dönüb baxmadan elə hey qaçırdınız. Rəsul da səsləyirdi sizi arxanızdan. Əlinizdən gedənlərdən, başınıza gələnlərdən qəmlənməyə macalınız olmasın deyə qəm üstündən qəm yağdırdı sizə Allah. İşləklərinizdən xəbərdardır Allah.

154. Sonra qəm-qüssənin ardınca əmin-amanlıq göndərdi Allah, sakitləşib mürgülədi bir qisminiz. Bə'ziniz də öz başının hayında idi, haqsız yerə Allah haqqında cahiliyyə çağından qalma bir fikirdə idi, "Rə'yimiz hanı bizim bu işdə?" deyirdi. "Əmr bütövlükdə Allahdan gələr" söylə onlara. Qəlblərində gizlədərlər sənə açıb demədiklərini. "Rə'yimiz bu işdə nəzərə alınsaydı öldürülməzdik burada" deyirdilər. "Evinizdə olsaydınız belə, alnına ölüm yazılanlar hökmən qovuşardılar əbədi mənzillərinə" söylə onlara. Ürəyinizdə nə var, nə yox -yoxlayıb bilər Allah.

155. İki dəstə üz-üzə gələn gün geri durdu bir qisminiz. Bə'zi işləklərinə görə onları yolundan çıxarmaq istəmişdi şeytan. Onları əfv etdi Allah. Şübhəsiz, bağışlayandır, həlimdir Allah.

156. Ey iman gətirənlər! Səfərə çıxan ya döyüşə gedən qardaşları barədə "yanımızda olsaydılar ölməzdilər, öldürülməzdilər" deyən kafirlərə oxşamayın ki, bir həsrət yükünü çökdürsün onların qəlbinə Allah. Həyatı verən də, alan da Allahdır. İşləklərinizi görür Allah.

157. Allah yolunda öldürülsəniz, ya ölsəniz onların yığdığından sizə daha xeyirli olar Allahın məğfirəti, rəhməti.

158. Ölsəniz ya öldürülsəniz, fərqi yoxdur, Allah dərgahında cəm olacaqsız.

159. Allahın rəhmətinin səbəbilə Sən onlara mülayim oldun. Kobud olsaydın, qəlbi qəliz olsaydın əgər, ətrafından dağılışıb gedərdilər. Əfv et onları, məğfirət dilə onlara, məsləhətləş onlarla. Gəldinmi bir qərara, güvən Allaha. Ona güvənənləri, şübhəsiz, sevər Allah.

160. Allah yardımını əsirgəməsə heç kim qalib gəlməz sizə. Tərk edərsə sizi əgər Ondan sonra kim sizə yardım edər. Qoy Allaha güvənsin mö'min olan kimsələr.

161. Heç bir peyğəmbərə aldatmaq [qənimətə, xalqın malına, əmanətə xəyanət] yaraşmaz. Aldadan kəs qiyamət günü gətirər aldadıb qazandığını. Sonra da insaf ilə qaytarılar hər kəsə öz qazancı.

162. Allahın rizasının ardınca gedən kimsə Allahın qəzəbinə, cəhənnəm əzabına düşənəmi oxşayar? Beləsinin nə acı taleyi var.

163. İnsanların dərəcələri var Allah yanında. Onların işləklərini görür Allah.

164. Mö'minlərə lütfkarlıq göstərdi Allah. Onların öz içindən seçib Allahın ayələrini oxuyan, paklığa çıxaran, Kitab və hikmət öyrədən bir Rəsul göndərdi onlara. Əvvəllər açıqdan-açığa bir çaşqınlıq içində vurnuxurdular.

165. Başqalarının başına ikiqat artıq gətirdiyiniz bir müsibət gələndə öz başınıza "Bu nədən oldu belə?" dediniz. "Səbəbini özünüzdə axtarın" söylə. Hər şeyə, şübhəsiz, qadirdir Allah.

166. İki dəstə üzləşəndə Allah sizi bəlaya salar ki, tanısın mö'minləri

167. və riyakarları. "Gəlin Allah yolunda savaşın ya heç olmazsa müdafiə olunun" deyiləndə riyakarlara, "Savaşmağı bacarsaydıq ardınızca gələrdik" dedilər. İmandan çox küfrə yaxındı onlar o gün. Yrəkdən gəlmirdi sözləri. Gizləyib demədiklərini bilir Allah.

168. Cərgədən geri qalıb qardaşları barədə "Sözümüzə baxsaydılar öldürülməzdilər" deyənlərə "Doğru sözlü, düz əməlli kimsələrsinizsə, gözləyin özünüzü ölümdən" söylə.

169. Ölmüş bilməyin heç vaxt Allah yolunda öldürülənləri. Diridir onlar, Rəblərinin dərgahında ruzisinə çatıblar.

170. Sevinirlər Allahın bol ne'mətinə. Onlara hələ qoşulmamış insanlara görə də aşıb-daşır sevincləri. Bunlara da zaval yox, üzülməzlər dərd əlindən!

171. Allahın ne'mətinə, bolluğuna görə aşıb-daşır sevincləri. Mö'minlərin əcrini boşa çıxarmaz Allah.

172. Yara aldıqdan sonra da Allahın və Rəsulun çağrışına səs verənlərin sırasında yaxşı davranan kəsləri, müttəqi olanları böyük bir əcir gözləyir.

173. "Sizə qarşı qoşun toplamış düşmənləriniz, qorxun onlardan" dedilər o kəslərə. Bu sözlər daha da artırdı imanlarını. "Tək Allah bəs edər bizə, nə gözəl vəkildir O" dedilər.

174. Allahdan ne'mət və bolluq alıb geriyə döndülər, heç bir pislik toxunmadı onlara. Allahın rizasını qazanmaq istədilər, itaət etdilər Ona. Böyük lütf sahibidir Allah.

175. O şeytansa [qoşunlardan qorxmağı təbliğ edən adamlar nəzərdə tutulur] öz dostlarını qorxuda bilər ancaq. Onlardan qorxmayın. Əgər mö'minsinizsə Məndən qorxun!

176. Qoy səni üzməsinlər bir-birilə kafirlikdə yarışanlar. Bir zərər verə bilməzlər Allaha. Allah istəməz onların bir nəsibi ola axirətdən. Böyük bir əzab gözləyir onları.

177. İmanı verib küfrü satın alanların bir zərəri dəyməz Allaha. Ağrılı bir əzab gözləyir onları.

178. Kafirlər elə bilməsinlər xeyri vardır onlara verdiyimiz möhlətin. Günahlarını artırsınlar deyə onlara möhlət veririk. Alçaldıcı bir əzab gözləyir onları.

179. O hala ki, siz düşmüsüz, imana gələnləri bu halda qoymaz Allah, yaxşıdan ayırar pisi. Qeybi sizə tanıdan deyil Allah. Ancaq peyğəmbərlərindən istədiyi birinə qeybi tanıdar Allah. Allaha, peyğəmbərlərinə iman gətirin. İman gətirsəniz, Allahdan çəkinsəniz böyük bir əcir veriləcək sizə.

180. O kəslər ki, xəsislik eləyirlər Allahın bol ne'mətinə, elə bilməsinlər xeyir gətirər bu onlara. Xeyr, şər gətirər bu onlara. Xəsislik elədikləri şeylər dolanar boyunlarına qiyamət günü. Göylərin və yerin mirası Allahındır. İşləklərinizdən xəbərdardır Allah.

181. "Biz varlıyıq, Allah fəqir" deyənlərin sözlərini eşitdi Allah. Nə deyirdilərsə, haqsız yerə peyğəmbərləri necə öldürürdülərsə hamısını yazacağıq və "Odda yanmaq əzabını dadın" deyəcəyik.

182. Əməlinizin əvəzidir bu. Yoxsa bəndələrə əsla zülm etməz Allah.

183. "Bizlərə and verdi Allah inanmayaq bir peyğəmbərə də əgər odun yeyəcəyi bir qurban gətirməsə o" dedilər. Sən də söylə: "Məndən öncə aşkar dəlillər və bu dediyinizi də gətirən peyğəmbərlər gəlmişdi sizə. Doğru sözlü, düz əməlli kimsələrsinizsə, nəyə görə öldürdünüz onları?"

184. Yalançı saydılarsa səni, yalançı saymışdılar deməli o peyğəmbərləri ki, səndən öncə aşkar dəlillərlə dolu yazılar və ziya verən Kitab gətirmişdilər.

185. Dadacaqdır hər bir insan ölümü. Qiyamət günü bütövlükdə veriləcək əcriniz. Kim ki, oddan uzaqlaşdırılıb cənnətə salınarsa, demək uğura uğramış o. Bu dünyada yaşamaq aldadıcı zövq-səfadan başqa bir şey deyildir.

186. Mallarınız və canlarınızla sınağa çəkəcəklər sizi. Heç şübhəsiz, əzab verən çoxlu söz eşidəcəksiz o kəslərdən ki, sizdən öncə onlara Kitab verilib və o kəslərdən ki, Allaha şərik qoşur onlar. Və əgər səbr göstərsəniz və Allahdan qorxsanız, bilin, bunlar işinizi öncədən möhkəm tutmaq deməkdir.

187. "Kitabı açıqlayacaqsız insanlara, onda olanları gizlətməyəcəksiz" deyə Kitab verilənlərdən söz almışdı Allah. Bir kənara atdı onu və dəyər-dəyməzinə satdı Kitabı onlar. Nə pis şeydir əvəzində aldıqları.

188. Heç elə bilməyin ki, elədiyinə sevinənlər, eləmədiyinə görə tə'riflənməyi sevənlər qurtulacaqlar əzabdan. Ağrılı bir əzab gözləyir onları.

189. Allahdır göylərin, yerin yiyəsi. Hər şeyə qadirdir O.

190. Göylərin və yerin yaranışının, gecə ilə gündüzün növbələşməsinin, şübhəsiz, dəlilləri var düşünən başlar üçün.

191. Ayaq üstə durarkən, bir yerdə oturarkən, böyrü üstə uzanarkən Allahı anar, göylərin və yerin yaranışını düşünə-düşünə deyər onlar: "Rəbbimiz, Sən bunları boş yerə yaratmadın, həmd olsun Sənə, od əzabından qoru bizi.

192. Sən kimi atdınsa oda, demək ləkəlidir o. Zalımlar yardımsız qalar.

193. Rəbbimiz, "Rəbbinizə iman gətirin" çağrışını eşitdik və gəldik imana. Rəbbimiz, suçumuzdan keç bizim, pis əməllərimizdən təmizləyib qurtar bizi, əməli salehlərin sırasında rəhmətə göndər bizi.

194. Rəbbimiz, peyğəmbərlərinə və'd etdiyini bizə ver, qiyamət günü bizi bədnam eləmə. Sən dönən deyilsən verdiyin sözdən".

195. Rəbləri dualarını qəbul buyurdu, dedi: "Mən sizlərdən bir kimsənin gördüyü işi, istər qadın olsun, istər kişi, heç vaxt boşa çıxarmaram. Hamınız bir candansınız. O kəslər ki, hicrət ediblər, qovulublar yurdlarından, yolumda əzab çəkiblər, vuruşublar və öldürülüblər - təmizləyib qurtararam onları pisliklərindən. Allahdan bir ne'mət olaraq içindən çaylar axan cənnətlərə salaram onları. Allah dərgahındadır savabların yaxşısı".

196. Kafirlərin rifah içində ölkə-ölkə dolaşması qoy səni çaşdırmasın.

197. Bir az zövq-səfa çəkər, sonra cəhənnəmə çökər onlar. Pisdən pis yataqdır ora!

198. Ancaq Rəblərindən qorxanları Allah dərgahından bir pay olaraq içindən çaylar axan cənnətlər gözləyir ki, oralarda əbədilik qalarlar. Allah dərgahında olan şeylər əməli salehlər üçün daha xeyirli.

199. Kitab əhlindən eləsi var Allaha tabe olub Ona, sizə göndərilənə, onlara göndərilənə inanar və dəyər-dəyməzinə satmaz ayələrini Allahın. Rəbləri verəcəkdir əcirlərini. Şübhəsiz, hesabı tez aparandır Allah.

200. Ey iman gətirənlər! Səbr eləyin, səbrlə silahlanın, cihada hazır dayanın və Allahdan qorxun ki, uğura uğrayasız.