Rəhman və Rəhim Allahın adıyla

1. Tökdü qaş-qabağını, çevirdi üzünü Peyğəmbər

2. bir kor kimsə gələn zaman yanına.

3. Nə bilirsən, bəlkə söhbətini eşidərək paklanacaqdı.

4. Yaxud bir öyüd alacaqdı, gərəyinə gələcəkdi bu öyüd.

5. Amma kim ki, varlıdır,

6. sən yalnız ona diqqət yetirirsən.

7. Bir halda ki, paklığa çağırmaqdır sənin işin sadəcə.

8. Amma yanına gələn zaman

9. Allahdan qorxan bir kəs,

10. ondan üz döndərirsən.

11. Belə davranmayasan. Allahın ayələri bir öyüddür, hamıdan ötrüdür.

12. Hər istəyən kimsəyə bu Qur'andan pay düşər.

13. Bu Qur'an müqəddəs vərəqlər üstündədir Allahın dərgahında.

14. Ucalmış, paklanmış bu vərəqlər.

15. Elçilərin [mələklərin] əlilə qələmə alınmış bu yazı.

16. Möhtərəm yaxşılardan olan elçilərin.

17. Ölüm olsun insana, onu kafirliyə nədir vadar eləyən?

18. Nədən yaratmış onu Allah?

19. Nutfədən yaratmış, sonra tədricən düzəltmiş onu.

20. Və sonra ömür yolunu asan eləmiş.

21. Axır öldürər, salar qəbrə onu.

22. Sonra istəsə dirildər onu.

23. Allahın əmrini gerçəkdən yerinə yetirməmiş o.

24. Bir nəzər sala insan öz yeməyinə.

25. Bolluca yağış tökdük,

26. bitkilərlə dəlik-dəlik elədik yer üzünü.

27. Bitirdik orada dənli bitkiləri,

28. üzümlükləri, yoncalıqları,

29. zeytun, xurma bağlarını,

30. sıx ağaclı bağ-bağatı,

31. növbənöv meyvələri, otları.

32. Sizin dolanmağınız üçündür, mal-qaranız üçündür bunların hamısı.

33. Qiyamətin gurultusu qopdumu,

34. o gün hər kəs qoyub qaçar qardaşını,

35. anasını, atasını,

36. arvadını, oğul-uşağını,

37. hamı öz hayında olar.

38. O gün bə'zi üzlərdən nur yağar,

39. təbəssüm yağar, sevinc yağar.

40. O gün bə'zi üzlər toza bürünər,

41. qaranlığa, qaraltıya bürünər.

42. Bax bunlardır o əxlaqsız kafirlər!